مەملەكەت باسشىسىنىڭ تاپسىرۋى بويىنشا الماتى اكىمى باۋىرجان بايبەك ۇلى وتان سوعىسىنىڭ ارداگەرى ءادىش ءابدىرايىموۆتى مەرەيلى 100 جاسقا تولۋىمەن قۇتتىقتادى.

ءادىش اتانىڭ ءوزى ايتقانداي، ول 1918 جىلى 9 مامىردا تۋىلعان. 1938 جىلى حاركوۆ فارماسيەۆتيكا ينستيتۋتىنا تۇسەدى، ال 1941 جىلى وڭتۇستىك-شىعىس مايدانى 173ء-شى اتقىشتار ديۆيزياسىنىڭ جاۋىنگەرى اتانادى.

بەرگەدورفتەگى تۇتقىندىق جانە نويەنگاممە كونسلاگەرىندەگى قيىنشىلىقتى باستان وتكەرگەن ءادىش ءابدىرايىموۆ ۇيىنە تەك 1947 جىلى ورالادى.

1952 جىلى تاشكەنتتەگى ورتا ازيا مەملەكەتتىك ۋنيۆەرسيتەتىن «بيولوگ» ماماندىعى بويىنشا ءبىتىرىپ شىعادى. وقۋدان سوڭ تاجىريبە ستانسياسىنىڭ زەرتحانا مەڭگەرۋشىسى بولادى جانە وڭتۇستىك قازاقستان وبلىسىنداعى قازىرگى ماقتارال اۋدانىندا ماقتانىڭ جاڭا سورتتارىن شىعارۋمەن اينالىسادى.

بۇگىنگى كۇنى ءادىش اتانىڭ ءتورت بالاسى، ءۇش نەمەرەسى جانە ءبىر شوبەرەسى بار.

«مەن بارلىقتارىڭىزدى بۇگىنگى ەرەكشە مەرەكەمەن قۇتتىقتايمىن. جەر بەتىندەگى بارلىق ادامدارعا دەنساۋلىق، باقىت جانە ءوزارا تۇسىنىستىك تىلەيمىن. ەڭ باستىسى – اسپانىمىز اشىق، ادامدار باقىتتى عۇمىر كەشۋدە. قازىرگى كەزدە ەلباسىمەن بىرگە ءبىزدىڭ حالقىمىز ءوزارا دوستىق پەن كەلىسىمدە بەيبىت ءومىر سۇرۋدە. قازاقستان ءارقاشان گۇلدەنە بەرسىن، سىزدەردىڭ ۇرپاق سوعىس پەن ونىڭ زاردابىن ەشقاشان كورمەسىن جانە تارتپاسىن»، - دەپ اتاپ ءوتتى ءادىش ءابدىرايىموۆ.

ەسكە سالساق. بۇگىن الماتىدا مەملەكەت باسشىسى قۇرمەتتى قاراۋىلمەن بىرگە داڭق مەموريالى جانىنداعى ماڭگىلىك الاۋعا گۇل شوقتارىن قويدى جانە ءبىر مينۋتتىك ۇنسىزدىكپەن ۇلى وتان سوعىسىندا قازا بولعانداردى ەسكە الدى.نۇرسۇلتان نازاربايەۆ سوعىس ارداگەرلەرىمەن جانە تىل ەڭبەككەرلەرىمەن كەزدەستى، ولاردىڭ اراسىندا ءادىش ءابدىرايىموۆ تا بولدى.