ىلە الاتاۋىنىڭ ەتەگىندە ەلىمىزدىڭ 1000-نان استام پالۋاندارى «بەلدەسۋ» ۇلتتىق كۇرەسى بويىنشا وتكەن العاشقى رەسپۋبليكالىق تۋرنيرگە قاتىسۋدا. بۇل وليمپيادالىق ەمەس ويىنداردىڭ الەمدىك جەلىسىنە رەسمي تۇردە ەنگەن ەڭ كونە ۇلتتىق كۇرەس ءتۇرى.

ءتۋرنيردى اشقان الماتى اكىمى باۋىرجان بايبەك ەلباسىنىڭ «رۋحاني جاڭعىرۋ» باعدارلاماسىن جۇزەگە اسىرۋدا بۇگىنگى كۇنى ۇلتتىق سپورت تۇرلەرىن دامىتۋعا ەرەكشە نازار اۋدارىلۋدا ەكەنىن ايتتى.

قازاقستاندىقتار اراسىندا «الامان بايگە»، «قازاق كۇرەسى»، «اۋدارىسپاق»، «جامبى اتۋ»، «كوكپار» بويىنشا جارىستار كەڭىنەن تانىمال بولۋدا.

ءوز كەزەگىندە قازاق كۇرەسى فەدەراسياسىنىڭ باسشىسى قانات بوزىمبايەۆ «بەلدەسۋ» ۇلتتىق كۇرەسى جاستارعا پاتريوتتىق تاربيە بەرۋمەن قاتار ەلىمىزدىڭ جاڭا چەمپيوندارىن اشۋى مۇمكىن ەكەنىن ايتتى. اتتارى اڭىزعا اينالعان قاجىمۇقان، بالۋان شولاق سىندى پالۋاندار وسىنداي سايىستارعا قاتىسقان ەدى.

«حالىق بارىسى» جوباسىنىڭ يدەيالىق قولداۋشىسى ارمان شورايەۆ تۋرنيرگە نيەت بىلدىرگەندەردىڭ بارلىعى، سونىڭ ىشىندە 18-دەن 50 جاسقا دەيىنگى شەتەلدىك سپورتشىلار دا قاتىسا الادى دەدى. جارىستىڭ الدىندا بارلىق سپورتشىلىر مەديسينالىق باقىلاۋدان وتەدى.

«ءاربىر جەكپە-جەك 5 مينۋتقا سوزىلادى. ەگەر پالۋاننىڭ بىرەۋى جەرگە قۇلاسا نەمەسە تىزەسىمەن، قولىمەن، دەنەسىنىڭ وزگە بولىگىمەن جەرگە تىرەلسە، جەڭىلگەن بولىپ سانالادى. ەسەپ تەڭ بولسا، وندا 3 مينۋت قوسىمشا ۋاقىت بەرىلەدى. بۇدان كەيىن دە جەڭىمپاز انىقتالماسا، وندا قاتىسۋشىلار سالماق ولشەۋدەن وتەدى. جەڭىس سالماعى ەڭ تومەن سپورتشىعا بەرىلەدى»، - دەدى ارمان شورايەۆ.

«حالىق بارىسى» ءتۋرنيرىنىڭ اشىلۋ سالتاناتى بارىسىندا كورەرمەندەر الدىندا «مۋزارتLIFE»، قايرات نۇرتاس، «وركەن»، «بوزتورعاي» بالالار حورى، مارجان اراپبايەۆا، ۇشقىن جامالبەك، نۇربولات ابدۋللين، ءابدىجاپپار ءالقوجا، ءمادينا ءسادۋاقاسوۆا، ق ر ۇقك شەكارا ۋچيليشەسىنىڭ كۋرسانتتارى جانە باسقالارى ونەر كورسەتتى.