كۇن سايىنعى جۇمىس ساپارى كەزىندە باۋىرجان بايبەك الماتىنىڭ كولىك جانە جۇرگىنشى ينفراقۇرىلىمى قۇرىلىسىنىڭ بارىسىن تەكسەردى. مەگاپوليس باسشىسى بىرنەشە ساعات ىشىندە اباي، بايتۇرسىنوۆ، اسقاروۆ، گاگارين كوشەلەرىن ارالاپ شىعىپ، ولاردى ودان ءارى كورىكتەندىرۋ بويىنشا ءبىرقاتار تاپسىرمالار بەردى.

ايدىڭ سوڭىنا دەيىن گاگارين داڭعىلىن ال-فارابيدەن تيميريازيەۆ كوشەسىنە دەيىن قايتا جاساۋ اياقتالادى. ۇزىندىعى 3 شاقىرىمنان اساتىن جاڭارعان جولمەن قاتار جۇرگىنشى تروتۋارلارى اباتتاندىرىلىپ، ارىق جەلىلەرى سالىنادى. پايدالانىلمايتىن كونسترۋكسيالار مەن زاڭسىز قۇرىلىستار الىنۋدا، سونان سوڭ كوشەلەردى جاسىلداندىرۋ جوسپارلانعان.

جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن ستيحيالى كولىك تۇراقتارىنىڭ ورنىنا داڭعىل جيەگىندەگى تروتۋارلار قالپىنا كەلتىرىلۋدە. قالالىقتاردىڭ تالابىن ەسكەرە وتىرىپ، گاگارين مەن قوجابەكوۆ كوشەلەرىنىڭ قيىلىسىنا باعدارشام ورناتۋ مۇممكىندىگى قاراستىرىلۋدا.

الماتى اكىمى بايتۇرسىنوۆ كوشەسىن ارالاعان كەزدە زاڭسىز سالىنعان كافەنىڭ جازعى تەرراسىن الىپ تاستاپ، جۇرگىنشى ۋچاسكەسىن قالپىنا كەلتىرۋدى تاپسىردى.

«Baykonyr» بيزنەس-ورتالىعى الدىنداعى جۇرگىنشى ايماعى كەڭەيەدى، كولىك تۇراعى جىڭىشكەرەدى.

جايلى قالا كەڭىستىگىن قۇرۋ ماقساتىندا مەگاپوليس باسشىسى اسقاروۆ كوشەسى بويىندا تروتۋار قۇرىلىسىن باستاۋدى تاپسىردى.

ەسكە سالساق، بيىلعى جازدا الماتىدا 150 كوشە جوندەلەدى، 30 كم تروتۋارلار جاسالادى، 600 اۋلا كورىكتەندىرىلەدى. بارلىق جەر استى وتپەلى جولدار كۇردەلى جوندەلەدى، جاڭا فونتاندار سالىنادى. بۇرىن قايتا جاسالعان پانفيلوۆ، جىبەك جولى، گوگول، قابانباي باتىر، بايسەيىتوۆا، تولەبايەۆ كوشەلەرى مەن «استانا» الاڭىنان وزگە مەگاپوليستىڭ ءبىرقاتار نەگىزگى داڭعىلدارى تۇگەلدەي جاڭارادى.