2017 جىلعى تمد كەدەنشىلەرى 8 توننا ەسىرتكى زاتتارىنىڭ جولىن كەسكەن. بۇل تۋرالى الماتىدا وتكەن تاۋەلسىز مەملەكەتتەر دوستاستىعىنا مۇشە مەملەكەتتەر كەدەن قىزمەتى باسشىلارى كەڭەسىنىڭ قۇقىق قورعاۋ بولىمشەلەرى كوميتەتىنىڭ 17-شى وتىرىسىندا ايتىلدى.

«سەگىز كول» كۋرورتتىق پاركىندە  وتكەن شاراعا ازەربايجان، ارمەنيا، بەلارۋس، قازاقستان، قىرعىزستان، رەسەي، تاجىكستان مەن وزبەكستان ەلدەرىنىڭ قۇقىق قورعاۋ بولىمشەلەرىندەگى كەدەن قىزمەتتەرىنىڭ باسشىلارى مەن قىزمەتكەرلەرى قاتىستى. «قۇقىق قورعاۋ قىزمەتىندەگى كەدەن ورگاندارى جۇمىسىنىڭ ماڭىزى جوعارى. ەندى ونى ودان ءارى دامىتۋ قاجەت، بىرىگىپ حالىقارالىق ىنتىماقتاستىق سالاسىنداعى كەدەندىك قۇقىق بۇزۋشىلىقتارعا قارسى كۇرەسۋ كەرەك»-دەدى شارادا ءسوز العان ق ر قم  مەملەكەتتىك كىرىستەر كوميتەتىنىڭ ءتوراعاسى ارداق تەڭگەبايەۆ. ۇيىمداستىرۋشىلاردىڭ ايتۋىنشا، جيىنعا قاتىسۋشىلار تمد  ەلدەرىندەگى كەدەن قىزمەتى سالاسىنداعى ەسىرتكىگە قارسى كۇرەس ماسەلەلەرىنە بىرلەسكەن قىزمەتكە باسا نازار اۋدارعان. تاراتىلعان مالىمەتتەرگە قاراعاندا، 2017 جىلعى تمد قۇقىق قورعاۋ بولىمشەلەرى كەدەندىك قىزمەتىندە زاڭسىز اينالىمنان شامامەن 8 توننا ەسىرتكى قۇرالدارىنىڭ، پسيحوتروپتىق زاتتاردىڭ جانە ولاردىڭ پرەكۋرسورلارى الىندى.

قاتىسۋشىلار كەدەن زاڭناماسىنىڭ بۇزىلۋىن انىقتاۋ جانە ونى توقتاتۋ ماقساتىندا ءوزارا ءتيىمدى ناتيجەلى اقپارات الماسۋ  باعىتتارىنداعى ءىس-شارالاردى ۇيىمداستىرۋ تۋرالى ايتتى. سونداي-اق، كوميتەتتىڭ تمد  تەرروريزمگە قارسى ورتالىعىمەن ءوزارا  ىنتىماقتاستىقتى دامىتۋ ماسەلەلەرى قارالدى. قاتىسۋشىلار وتىرىستا قىلمىستىق كىرىستەردى جويۋ مەن تەرروريزمدى قارجىلاندىرۋعا قارسى كۇرەستى كۇشەيتۋدىڭ ماڭىزىن اتاپ ءوتتى.