الماتىدا ۇبت وتكىزۋدىڭ شارالارى قولعا الىندى. بۇل تۋرالى قالالىق ءبىلىم باسقارماسىنىڭ باسشىسى گۇلنار حودجابەرگەنوۆا ايتتى.

باسقارما باسشىسى ۇبت كەزىندە اقپاراتتىڭ قۇپيالىعى مەن ادامي فاكتوردى بولدىرماۋ شارالارىن جوو قۇزىرىندا ەكەنىن ايتتى. «اۋديتوريالاردىڭ دايىندىعى، تەحنيكالىق قاجەتتىلىكتەردى جوو باسشىلىعى قامتاماسىز ەتەدى. ءقازىر جوو-لار 182 كامەرا، 102 ۇيالى تەلەفون بايلانىس سيگنالدارىن تۇنشىقتىرۋ قۇرالىن، 31 مەتالل ىزدەۋ قۇرالىن، 7 رامالىق مەتاللودەتەكتور ساتىپ الدى»، - دەدى باسقارما باسشىسى گۇلنار حودجابەرگەنوۆا «نۇر وتان» پارتياسى بولىمشەسىنىڭ باسپا ءسوز ورتالىعىندا.

ونىڭ ايتۋىنشا، الماتىدا ۇبت 8 وقۋ ورنىنىڭ بازاسىندا وتكىزىلەدى. «ۇبت كەزىندە تۇلەكتەردى تەست تاپسىرۋ ورنىنا جەتكىزۋ ءۇشىن ءىىد قىزمەتكەرلەرى بولىنەدى. سونداي-اق، تاڭعى 8-دەن باستاپ جوو بازاسىندا پوليسيا مەن جەدەل جاردەم كەزەكشىلىك جۇرگىزەتىن بولادى»، - دەدى باسقارما باسشىسى. سونىمەن قاتار، تەستىلەۋ كەزىندە ءتارتىپتى ق ر بعم بەكىتكەن مەملەكەتتىك كوميسسيا قاداعالايتىن بولادى. ازىرگە ۇبت قاشان وتەتىنى بەلگىسىز.  بۇعان دەيىن حابارلاعانىمىزداي، بيىل الماتىدا مەكتەپ تۇلەكتەرىنىڭ 80 پايىزى، ياعني 7300 وقۋشى ۇبت تاپسىرادى.