«سپورتتىق الماتى» باعدارلاماسى اياسىندا ءۇشىنشى بۇقارالىق ۆەلوشەرۋ ءوتتى.

شەرۋگە قاتىساتىندار سورەگە «نۇرلى تاۋ» بيزنەس ورتالىعىندا جينالدى. 9 شاقىرىم قاشىقتىقتى قۇرايتىن ۆەلوشەرۋ اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ماڭىندا اياقتالدى. مارەدە قاتىسۋشىلاردىڭ اراسىندا باعالى سىيلىقتار مەن ۆەلوسيپەد ويناتىلدى. باستى سىي، ەكى ۆەلوسيپەد ۆەلوسپورت باپكەرلەرىنە بۇيىردى. 

«ءبىز ءاردايىم قاتىسامىز، ءبىز ءۇشىن بۇل جاتتىعۋ دەسەك تە بولادى. وسىمەن ەكىنشى رەت ۆەلوسيپەدتى جەڭىپ الدىق. مەن «Apple team» كومانداسىنىڭ باپكەرىمىن. وكىنىشكە وراي، سپورتشىلارعا ۆەلوسيپەد جەتىسپەيدى. سوندىقتان، شاكىرتتەرىمە سىيلايمىن. جاڭبىر جاۋادى دەپ بولجانسا دا، قاتىسۋشىلار سانى كوپ. بۇل كەرەمەت جوبا. قالا اكىمدىگى مەن سپورت باسقارماسىنا العىسىمىز شەكسىز»، - دەدى جەڭىمپاز جاننا يۋسۋپوۆا.

ايتا كەتەر جايت، وسى ۆەلوشەرۋ «سپورتتىق الماتى» قالالىق باعدارلاماسىنىڭ قولداۋىمەن 2018ء-شى جىلى جوسپارلانعان 21 ۆەلوشەرۋدىڭ ءۇشىنشىسى. «سپورتتىق الماتى» باعدارلاماسى مەگاپوليستەگى بۇقارالىق سپورتتى دامىتۋ ماقساتىندا جۇزەگە اسىرىلۋدا.