الماتى جۇرتشىلىعى العاشقى تەڭگەنىڭ ديزاينىن جاساعان اۆتورلاردىڭ ءبىرى تيمۋر سۇلەيمەنوۆتى باقيلىق ساپارعا شىعارىپ سالدى. قارالى جيىن ءا.قاستەيەۆ اتىنداعى مۋزەيدە ءوتتى.

مارقۇمدى باقيلىق ساپارعا شىعارىپ سالۋعا بارلىق ارىپتەستەرى، تۋىستارى، ونەر سالاسىنىڭ وكىلدەرى، الماتى اكىمى، ق ر ۇلتتىق بانكىنىڭ وكىلدەرى جينالدى.

«اعامىزدىڭ قايتىس بولعانى تۋرالى  سۋىق حاباردى ەستىپ كەشەلى بەرى وتباسىنا قولداۋ كورسەتىپ جاتىرمىز. اعامىزبەن سوڭعى ءۇش جىلدا اكىم رەتىندە تىعىز جۇمىس ىستەدىم. الماتىنىڭ بۇگىنگى كەلبەتى، دامۋ تۇجىرىمداماسىنا ۇلەس قوسقان ادام. بۇل كىسى ەلباسىنىڭ قولىنان »پاراسات» وردەنىن العان، ق ر ەڭبەگى  سىڭگەن ونەر قايراتكەرى. ول كىسىنىڭ مۇراسى قانشاما جىل حالىققا قىزمەت ەتەدى. جاقسىنىڭ اتى ۇمىتىلمايدى دەگەن ءسوز بار»، - دەدى  الماتى قالاسىنىڭ اكىمى باۋىرجان بايبەك.

ودان كەيىن ءسوز العان مادەنيەتتانۋشى-عالىم، مەملەكەت جانە قوعام قايراتكەرى مۇرات اۋەزوۆ تيمۋر سۇلەيمەنوۆتىڭ وتباسى تۋرالى ەستەلىكتەرىمەن ءبولىستى.

«تيمۋر سۇلەيمەنوۆ ونەر، ديزاين سالاسىندا جۇرگەن جانداردىڭ بىرەگەيى ەدى. بۇگىن مەنىڭ باۋىرىمدى ونەر ورداسىنان شىعارىپ سالىپ جاتىرمىز. ول ەلدىڭ ادامى جانە مەملەكەتشىل، ۇلتجاندى ازامات بولاتىن. وعان تالاي كۋا بولعامىز. ونىڭ اناسى ماريام اپاي ءومىردىڭ قانشا قيىنشىلىعىنان ءوتىپ، التىن اسىقتاي ازاماتتاردى تاربيەلەپ ءوسىردى. ول - ۇلكەن ەرلىك. ول كىسىنىڭ ءاربىر بالاسى حالىقتىڭ ۇلىنا اينالدى. بۇگىن تيمۋردى اقتىق ساپارعا شىعارىپ سالۋعا كەلگەن تۇلعالاردىڭ بارلىعى ادامي قۇندىلىقتارعا ادال قىزمەت ەتكەن ۇرپاقتىڭ وكىلدەرى»، - دەدى مۇرات اۋەزوۆ.

تيمۋر سۇلەيمەنوۆ 10 مامىردا 75 جاسقا قاراعان شاعىندا مەڭدەگەن اۋرۋدان كوز جۇمعان ەدى.

 تيمۋر بيماش ۇلى سۇلەيمەنوۆ  1943 جىلى 14 اقپاندا وڭتۇستىك قازاقستان وبلىسىنىڭ قارابۇلاق اۋىلىندا تۋعان. 1965 جىلى - لەنينگراد قۇرىلىس-ينجەنەرلىك ينستيتۋتىن، 1970 جىلى  قازاق پوليتەحنيكالىق ينستيتۋتىن (1970) بىتىرگەن. تيمۋر سۇلەيمەنوۆ - ساۋلەتشى،  قازاق باس ساۋلەت-قۇرىلىس اكادەمياسىنىڭ قۇرمەتتى پروفەسسورى. حالىقارالىق ونەر اكادەمياسىنىڭ اكادەميگى، ق ر كوركەمونەر اكادەمياسىنىڭ قۇرمەتتى اكادەميگى، قازاقستاندىق ديزاين مەكتەبىنىڭ نەگىزىن سالۋشى. الماتى وبلىسىنداعى «چەركاسسك قورعانىسىنىڭ باتىرلارىنا» مەموريالدىق كەشەنىنىڭ؛ تۇركىستان قالاسىن قايتا قۇرۋ جانە تاريحي-مادەني تۋريستىك ورتالىققا اينالدىرۋ جوباسىنىڭ اۆتورى. شىمكەنت جانە جاناتاس قالالارىن سالۋدىڭ باس جوسپارلارىن ازىرلەۋگە، تۇركىستان قالاسىنىڭ تاريحي ايماعىن قالپىنا كەلتىرۋگە، ق.ا. ياساۋي كەسەنەسى اينالاسىنداعى تاريحي ايماقتى قايتا قۇرۋ جوباسىنا قاتىسقان. «ق ر رەسپۋبليكالىق ءستيلى» كەشەندى مەملەكەتتىك ديزاين-باعدارلاماسىنىڭ جەتەكشىسى؛ ۇلتتىق ۆاليۋتا ديزاينىن جاساۋ،  جوبالاۋ، ق ر قارۋلى كۇشتەرى ديزاين-باعدارلامالارىن جاساۋمەن اينالىسقان جۇمىس توپتارىنىڭ جەتەكشىسى.  1965 جىلدان - «قازقالاقۇرىلىسجوبالاۋ»» جوبالاۋ ينستيتۋتىنىڭ ساۋلەتشىسى، الماتى قالاسى كالينين اۋدانىنىڭ باس ساۋلەتشىسى،  1968 جىلدان - «المااتاگيپروگور» ينستيتۋتىندا ساۋلەتشىلەر توبىنىڭ جەتەكشىسى، «قازقالاقۇرىلىسجوبالاۋ» ينستيتۋتىنىڭ جوبالار بويىنشا باس ساۋلەتشىسى،  1982 جىلدان - قازاقستاننىڭ كوركەمدىك قورىنىڭ باس سۋرەتشىسى، قالالىق ورتانىڭ ديزاينى شەبەرحاناسىنىڭ جەتەكشىسى،  1987 جىلدان - «قازاقستان ديزاينەرلەر وداعى» رقب باسشىسى قىزمەتىن  اتقارعان.

مارقۇمنىڭ ارتىندا جارى، 2 بالاسى مەن 2 نەمەرەسى قالدى.