الماتى قالاسىندا جەڭىس كۇنى مەرەكەسىنە وراي سپورتتىق جانە جاۋىنگەرلىك سامبودان اشىق بىرىنشىلىك وتەدى.

سامبودان الماتى قالاسىنىڭ باس باپكەرى باۋىرجان سادىحانوۆ ءمالىم ەتكەندەي اتالعان دودا جەڭىس كۇنى مەرەكەسىنە وراي ۇيىمداستىرىلىپ وتىر. وعان قازاقستان سپورتشىلارىنان بولەك، تاجىكستان، وزبەكستان، رەسەي جانە بەلارۋس سامبوشىلارى دا قاتىسادى. جارىس 5-6 مامىر كۇندەرى الماتىداعى «دوستىق» سپورت كەشەنىندە وتەدى. قازاق ەلىنىڭ نامىسىن تالاي سىندا ىسىلعان  سپورتشىلار قورعايدى. اتاپ ايتار بولساق جاۋىنگەرلىك سامبودان الەمنىڭ ەكى دۇركىن قولا جۇلدەگەرى نۇرگەلدى قيالبەكوۆ پەن جاقىندا عانا ەل بىرىنشىلىگىندە كوزگە تۇسكەن باتىر مۇقاتايەۆ بار. سونداي-اق، ميراس باۋبەرىكوۆ، سامات ساعاتبەكوۆ، تولەنباي قاسىمحان جانە نيەتباي داۋلەت سىندى سامبوشىلار بار.