الماتى ساياباقتارىنا بيىكتىگى 50 سم بولاتىن قىزعالداقتىڭ جاڭا ءتۇرى - «پرەزيدەنت نازاربايەۆ» گۇلدەرى وتىرعىزىلدى.

جاڭا سۇرىپتى گوللانديالىق سەلەكسيونەرلەر 2014 جىلى شىعارعان جانە نۇرسۇلتان نازاربايەۆتىڭ نيدەرلاندىعا ساپارى بارىسىندا تانىستىرعان.

ارادا ءتورت جىل وتكەن سوڭ، ەلباسىنىڭ ەسىمىمەن اتالاتىن جاڭا سۇرىپ الماتىنىڭ ورتالىق جانە تۇڭعىش پرەزيدەنت ساياباقتارىنا ورناتىلدى.

«بۇل سۇرىپ وتە ءتوزىمدى، ساباقتارى بەرىك ءارى بيىك، جاپىراعى تولقىندى بولىپ كەلەدى. گرەيگ قىزعالداعىنا ۇقسايدى، ءبىراق تاڭبالارى جوق. قاۋىزى لالاگۇل ءتارىزدى جانە ورتاسى قارا ەمەس، سارى. ءيىسى دە وزگەشە»، - دەدى جاس ناتۋراليستەر ستانسىسىنىڭ ديرەكتورى زەينەپ اريشيەۆا.

ەرەكشە سۇرىپتى ساتىپ الۋ، ءوسىرۋ جانە كۇتىپ-باپتاۋ جۇمىستارىن جەكە كومپانيا اكىمدىكتىڭ قولداۋىمەن جۇزەگە اسىرۋدا.

«ءقازىر الماتىنىڭ ورتالىق جانە تۇڭعىش پرەزيدەنت ساياباقتارىنا 5 مىڭ قىزعالداق وتىرعىزدىق. نيدەرلاندتىق سەلەكسيونەرلەرمەن كەلىسىمشارت ورناتىلدى، ءبىز ولاردىڭ وكىلدەرى بولىپ سانالامىز»، - دەيدى «گرينلەند» ج ش س ديرەكتورى گۇلزادا قالدىبايەۆا.

مامانداردىڭ ايتۋىنشا، قىزعالداقتار ەكى اپتا بويى گۇل اشىپ تۇرادى. ودان كەيىن الماتىلىقتار بۇل گۇلدەردى كەلەسى جىلى عانا تاماشالاي الادى.

«ءقازىر ەكى ساياباققا گۇلەردى كوبىرەك وتىرعىزىپ، 100 مىڭعا دەيىن جەتكىزۋىمىز كەرەك. سودان كەيىن عانا بۇل سۇرىپتى ساتىلىمعا شىعارا الامىز. وكىنىشكە قاراي، پيازشىقتاردىڭ 30% عانا كوبەيۋگە قابىلەتتى. كەلەسى جىلى تاعى دا ساتىپ الىپ، گۇلدەر سانىن كوبەيتەمىز»، - دەپ ءتۇسىندىردى گۇلزادا قالدىبايەۆا.