كۇلە ءبىلۋ - ءومىر، كۇلدىرە ءبىلۋ - ونەر. الماتىدا ويى مەن ءسوزى جۇيرىك، تابان استى تاپقىر جاستار ساحنادا قاۋىشتى. ويتكەنى، الىپ شاھاردا كوڭىلدى تاپقىرلار كلۋبى قايتا جۇمىسىن باستادى. العاشقى گالا-كونسەرتتە 19 كوماندا ونەر كورسەتتى. ال فينالعا تەك مىقتىلارى عانا جولداما الادى. سوڭعى ءسوزدى توپتاردىڭ ازىلدەرىنە باعا بەرەتىن ءادىلقازى القاسى مۇشەسى ايتادى.
بۇل جانعا ءدارۋ كۇلكىنى وتكىر قارۋعا اينالدىرعان جاستار. ولار ءار سەكۋند سايىن ازىلدەپ، جۇرتتى قىران-توپان كۇلكىنىڭ استىندا قالدىردى. استارلى قالجىڭدى بىردەن تۇسىنگەن كورەرمەندەر قولپاشتاپ جاتىر. ويتكەنى، جۇرت كۇلكى فەستيۆالىن ساعىنىپ قالعانى بايقالادى. بيىل الماتىداعى ليگانى تاجىربيەسى مول، ەلگە تانىس ءازىلقويلار قولعا العان.
«الماتى ليگاسى جالپى كۆن، قازاقستانداعى كۆن بۇرىننان بولعان. ءبىز جاي عانا ءسونىپ قالعان وتتى ودان سايىن جانداندىرىپ جىبەردىم دەسەم، قاتەلەسپەسپىن. ويتكەنى، بىرىنشىدەن سەبەبى نەدە؟ نە ءۇشىن اشتىق؟ تۇرىپ قالعان كوماندالار، ويناۋعا ءوزىنىڭ جالپى ىقىلاسى بار، وينايم دەگەن نيەتتەگى كوماندالارعا وسىنداي ءبىر الاڭ ۇيىمداستىرىپ، وسىنداي وينايتىن ليگا بولسا ەكەن»، - دەدى كوڭىلدى تاپقىرلار كلۋبىنىڭ جۇرگىزۋشىسى ەركەبۇلان مىرزابەكوۆ.
الماتى ليگاسىنىڭ ساحناسىنا 45 كوماندا ونەر كورسەتۋگە نيەت بىلدەرگەن. الايدا، ءازىلقازى مۇشەلەرى مەن رەداكتورلار ونىڭ تەك 19-ىن تاڭداپ الىپتى. تارتىستى تالاس ارى قاراي دا جالعاسادى دەيدى ۇيىمداستىرۋشىلار. ايتا كەتەيىك، ليگاگا ەلىمىزدەگى ءار ءتۇرلى ۋنيۆەرسيتەتتەرىنەن كەلگەن ستۋدەنتتەر قاتىسىپ جاتىر.
«ءار كوماندانىڭ قايتالانباس ءوز ستيلدەرى قالىپتاستان. سوندىقتان كورەرمەن ءۇشىن ولاردىڭ ويىندارىن كورۋ قىزىق بولايىن دەپ تۇر. ەلىمىزدىڭ ءار وڭىرىنەن كەلگەن توپتاردان بولەك وزبەكستان، قىرعىز، رەسەيدەن دە قاتىسىپ جاتقاندار بار»، -دەدى كوڭىلدى تاپقىرلار كلبۋىنىڭ رەداكتورى مارات ورالعازين.
العاشقى فەستيۆال بۇل تەك تارتىستىڭ باسى عانا. كىل مىقتى كوماندانىڭ ەسىمى جەلتوقسان ايىندا بەلگىلى بولادى. جەڭىسكە جەتكەندەر تەك كۋبوككا عانا ەمەس، حالىقارالىق سوچيدەگى فەستيۆالگە جولداما الادى.
