الماتىداعى حالىققا قىزمەت كورسەتۋ ورتالىقتارى وسى جىلدىڭ ءى توقسانىندا 1 ميلليوننان استام قىزمەت كورسەتكەن. سونىڭ ىشىندە باسىم بولىگى ورتالىقتا كورسەتىلسە، قالعانى ەلەكتروندى ۇكىمەت پورتالى ارقىلى جۇرگىزىلگەن. قازىرگى تاڭدا سيفرلىق حالىققا قىزمەت كورسەتۋ ورتالىقتارىنىڭ تيىمدىلىگى ارتۋدا. قالادا مۇنداي ارنايى ورىن المالى اۋدانىندا جۇمىس ىستەپ جاتىر. ¤

ستەپان تيموفەيەۆ ەلەكتروندى ۇكىمەت پورتالىن قولدانۋدى جاقىندا ۇيرەنگەن. ونى مەڭگەرگە حالىققا قىزمەت كورسەتۋ ورتالىعىنداعى ماماندار كومەكتەسىپتى. بۇگىندە وقىتۋ كۋرستارى بارلىق ورىنداردا جۇرگىزىلەدى. جاڭا جوبا ازاماتتارعا ۋاقىتتارىن ءتيىمدى پايدالانۋعا مۇمكىندىك بەرەدى، دەيدى ول.

«وقىتۋ كۋرسىنا تەك 30 مينۋت ۋاقىت قاجەت. كەيىننەن ءوز بەتىڭشە ۇيرەنگەنىڭدى ارنايى زالدا تەكسەرە الاسىڭ. وتە جاقسى جاسالعان. ەندى ءتۇرلى انىقتامانى الۋ ءۇشىن حالىققا قىزمەت كورسەتۋ ورتالىعىنا بارۋدىڭ قاجەتى جوق. ۇيدە وتىرىپ-اق كەرەكتى قۇجاتتاردى شىعارىپ الۋعا بولادى»، - دەدى ستەپان تيموفەيەۆ.

وقىتۋ كۋرستارىنان بولەك، ورتالىق قىزمەتكەرلەرى سيفرلىق ساۋاتتاندىرۋ جۇمىستارىن جۇرگىزۋدە. وسى ۋاقىتقا دەيىن 200-دەن اسا شارا وتكەن. ول ارقىلى 14 مىڭ ازامات قامتىلعان. سونداي-اق حالىق قاراسى قالىڭ قوعامدىق ورىنداردا ارنايى پۋنكتتەر جۇمىس ىستەيدى. 

«بارلىق فرونت وفيستاردى بايقاساڭىزدار، الماتى قالاسىندا بولسىن، بۇكىل ەلىمىزدە حالىقتىڭ سيفرلىق قىزمەت الۋىنا ىڭعايلاپ ورىندىقتاردى، ۇستەلدەردى سوعان ىڭعايلاپ قويىپ جاتىر. بۇرىن ادامدار دايىن وتىرعان ماماندارعا جۇگىنەتىن ەدى. ال بۇگىندە كەلگەندە ۇستەلدەر قويىلعان. سول جەرگە قىزمەت الايىن دەپ كەلەدى»، - دەدى  الماتى قالاسى حالىققا قىزمەت كورسەتۋ ورتالىعى دەپارتامەنتى قوعاممەن بايلانىس جونىندەگى مەنەدجەرى جاڭىل اپەتوۆا.

جوبانىڭ نەگىزگى ماقساتى - تۇرعىندارعا ەلەكتروندىق قىزمەتتەردى ءۇي جاعدايىندا الۋعا ۇيرەتۋ. ءسويتىپ ەلباسىنىڭ «سيفرلى قازاقستان» باعدارلاماسىندا ايتىلعان مىندەتتەردىڭ ءبىر باعىتىن ورىنداۋ. بيىل حالىقتىڭ سيفرلىق ساۋاتتىلىعىن 78،5 پايىزعا دەيىن ارتتىرۋ كوزدەلگەن.