الماتىلىق التى جاسار دىنمۇحاممەد تولەندينوۆ شاحماتتان الەم چەمپيونى اتاندى. جاھاندىق جارىستا وتانداسىمىز ءازىربايجان مەن موڭعوليانىڭ سپورتشىلارىن ۇتىپ، باس جۇلدەگە يە بولدى.

دىنمۇحاممەد باقىت ۇلى شاحماتقا قىزىققانىنا كوپ ۋاقىت بولماپتى. نەبارى 5 جاسىندا عالامتوردان اتالعان ويىننىڭ بەينەساباعىن قاراپ، ۇيرەنگەن. ءقازىر اكەسىن ويلانباستان ۇتاتىن جاعدايعا جەتتى. بالاسىنىڭ وسى سپورتقا ىنتاسى بارىن سودان بايقادىق، دەيدى اكەسى. كەيىن شاحمات سەكسياسىنا قاتىسا باستاعان. از ۋاقىتتىڭ ىشىندە ۇلكەن ناتيجە كورسەتىپتى.

«5 جاسىنان باستاپ شاحماتتى ءوزىم ۇيرەتتىم كىشكەنە. مەن ءوزىم شاحماتشى ەمەسپىن. ىنتاسى بولدى. سودان كەيىن شاحمات مەكتەبىنە بەردىم. سودان بەرى جاقسى ناتيجەلەر كورسەتىپ ءجۇر. 6 جاسىندا 1ء-شى دارەجە الدى. ءبىزدىڭ الماتىدا ونداي بالالار جوق-اۋ دەيمىن»، - دەدى د. تولەندينوۆتىڭ اكەسى باقىت تولەندينوۆ.

ديماش شاحماتتى ويناعاندا ۇلكەن سپورتشىلار سەكىلدى ادىستەر قولدانادى، دەيدى ۇستازى. الايدا، ويىن بالاسى بولعاننان كەيىن ءبىر ورىندا ۇزاق وتىرىپ جالىعادى دەيدى.

«ديماش بىزگە كەلگەندە 3ء-شى رازريادتا بولعان. توپقا الىنا سالىسىمەن تەز دامي باستادى. ءبىر ايتقان زاتتى تەز ۇيرەنىپ الادى. 3 ايدىڭ ىشىندە 1ء-شى رازريادتى ورىندادى. سودان كەيىن ءبىز ديماشپەن جەكە دايىندالا باستادىق. پروفەسسيونالدى تۇردە جۇمىس ىستەدىك. ناتيجەسىندە، الەم چەمپيونى اتاندى. التى جاسار بالا شاحماتتان جاھاندىق جارىستا باس جۇلدە الۋ دەگەن ۇلكەن جەتىستىك»، - دەدى حالىقارالىق گروسسمەيستەر الەكساندر كاشاشۆيلي.

دىنمۇحاممەد تولەندينوۆ 6 جاسىندا شاحماتتان الەم چەمپيونى اتاندى. 7 جاسقا دەيىنگى جاسوسپىرىمدەر اراسىندا وتكەن الەم چەمپيوناتىندا قارسىلاستارىنان 1،5 بالل جوعارى جيناپ، وق بويى وزىپ شىققان. جاھاندىق جارىستا باس جۇلدە العاننان كەيىن بىردەن سپورت شەبەرىنە ۇمىتكەر اتاعىن دا الىپتى.

«6-شى، 7ء-شى جانە 8ء-شى تۋردا ديماشقا وتە مىقتى قارسىلاستار ءتۇستى. اسىرەسە، ءازىربايجان شاحماتشىلارى قيىندىق تۋعىزدى. الايدا، ءبىزدىڭ بالاقاي ۇشەۋىن دە جەڭىپ، چەمپيون اتاندى»، - دەدى حالىقارالىق گروسسمەيستەر الەكساندر كاشاشۆيلي.

ءقازىر ديماش قاراشا ايىندا يسپانيادا جاسوسپىرىمدەر اراسىندا وتەتىن جارىسقا دايىندالىپ جاتىر. اپتاسىنا 6 كۇن شاحمات ساباعىنا قاتىسىپ ءجۇر. ۆۋندەركيندتىڭ اكەسى بالاسىنىڭ جانسايا ابدۋمالىك سەكىلدى قازاقستاننىڭ اتىن الەمگە تانىتسا ەكەن دەيدى.