الماتىداعى جەدەل جاردەم كولىكتەرىنىڭ بارلىعى جىل سوڭىنا دەيىن سارعىلت تۇسكە بويالادى. ءقازىردىڭ وزىندە قالاداعى 10 سانيتارلىق اۆتوكولىك جاڭا تالاپقا ساي جاساقتالىپ، سارعايىپ شىعا كەلدى. جەدەل جاردەمنىڭ جاڭا ديزاينى قىزمەت ساپاسىنا قانشالىقتى اسەر ەتپەك؟ جاردەم بريگاداسى شاقىرتۋعا راسىمەن تەز جەتە مە؟
بيىل ەلىمىزدەگى بارلىق جەدەل جاردەم كولىگى ليمون تۇسكە بويالىپ، مىناداي جارىق شاعىلىسپايتىن قىزىل ەلەمەنتتەرى پايدا بولادى. ءقازىردىڭ وزىندە الماتىداعى جاۋاپتى ماماندار 10 كولىكتى جاڭا تالاپتارعا ساي سارعىلت تۇسكە بوياپ ۇلگەرىپتى، ال قالعان 167ء-سىن جىل سوڭىنا دەيىن جاڭا تۇسكە الماستىرۋدى كوزدەپ وتىر.
دامىعان ەلدەردەگى جەدەل جاردەم قىزمەتىنە ساي، جاڭا ديزاينمەن جارقىن تۇسكە بويالعان بۇل سانيتارلىق كولىكتى الماتىداعى اق حالاتتىلار سىناپ كوردى. دارىگەرلەر روزىباكييەۆ كوشەسىندەگى شاقىرتۋعا جەتۋ ءۇشىن جەدەل جاردەم ستانسياسىنان 2 كولىككە ءبولىنىپ، ءبىر مەزەتتە شىقتى. ءبىر بريگادا اق كولىككە وتىرسا، قالعانى ليمون ءتۇستى ماشيناعا ءمىندى. الايدا، سيگنالىنىڭ داۋسى قاتتى شىعاتىن، ءارى بىردەن كوزگە تۇسەتىن سارعىلت تۇسكە بويالعان جەدەل جاردەم دىتتەگەن جەرىنە جىلدام جەتسە، اق تۇستەگى كولىك 5 مينۋتقا كەشىكتى. شۇعىل كومەككە مۇقتاج جاندار ءۇشىن بۇل كىدىرىستىڭ ءوزى كەرى اسەرىن بەرەدى، دەيدى اق حالاتتىلار.
ساراپتاماعا سايكەس، قانىق تۇسكە بويالعان جەدەل جاردەم كولىگى باسقا كولىكتەرگە قاراعاندا بىردەن كوزگە تۇسەتىن كورىنەدى. سونىڭ ارقاسىندا تاس جولداعى تىزگىنشىلەر ولارعا بىردەن جول بەرەدى ەكەن. دەسە دە، جەدەل جاردەم قىزمەتكەرلەرى ارنايى تەحنيكانىڭ دابىلى مەن تۇسىنە دە بەي-جاي قارايتىن جۇرگىزۋشىلەر كوبەيىپ كەتەكەنىنە قىنجىلۋدا.
«كوبىنەسە جىبەرمەيدى، كەي جۇرگىزۋشىلەر بار جىبەرەدى. كەز كەلگەن ۋاقىتتا كەپتەلىستە كوپ تۇرىپ قالامىز. كەشىگىپ كەلەتىن كەزدەر بولادى»، - دەدى جەدەل جاردەم كولىگىنىڭ جۇرگىزۋشىسى مۇرات ەسەنبايەۆ.
2 ميلليونعا جۋىق حالىق تۇراتىن الماتى قالاسىندا جەدەل جاردەم قىزمەتىنە كۇنىنە ەكى جارىم مىڭعا جۋىق شاقىرتۋلار تۇسەدى. مەديكتەر ءبىرىنشى كاتەگوريالى شاقىرتۋعا15 مينۋتتا جەتۋى كەرەك. ءبىراق كولىك كەپتەلىسى مەن جۇرگىزۋشىلەردىڭ جول بەرمەۋى كەسىرىنەن العاشقى كومەك كورسەتۋشىلەر جارتى ساعاتقا دەيىن كەشىگەدى ەكەن. سوندىقتان بيىل قالاداعى حالىق كوپ تۇراتىن اۋماققا قوسىمشا مودۋلدىك پودستانسيالار قويۋ كوزدەلىپ وتىر.
«ءبىز قوسىمشا ءقازىر تاعى دا مودۋلدىك پودستانسيالاردى قويۋ جوسپارلاپ وتىرمىز. ياعني، بۇگىنگى كۇنى ءبىزدىڭ ەڭ الىس باراتىن جەدەل جاردەم ماشيناسىنىڭ باراتىن جەرى 18 كم-گە دەيىن بولاتىن بولسا ۇزاقتىعى، سول قويىلاتىن مودۋلدىك پودستانسيالاردىڭ ارقاسىندا 7 كم-گە دەيىن بارۋ ۇزاقتىعى ازايىپ 10-15 مينۋتتتا جەتۋ ماسەلەسىن جەتۋ جولىن ءبىز قاراستىرىپ جاتىرمىز. 21 جەرگە قويىلايىن دەپ وتىر. بيىلعا جوسپارىمىز بار»، - دەدى الماتى قالاسى مەديسينالىق جەدەل جاردەم ستانسياسىنىڭ باس دارىگەرى ءسابيت پازىلوۆ.
بۇگىندە الماتى قالاسىندا شۇعىل كومەك كورسەتەتىن 177 اۆتوكولىك جۇرسە، 700-گە جۋىق اق حالاتتى ناۋقاستارعا قول ۇشىن سوزادى. دەسە دە، مامان تاپشىلىعى بار، دەدى باسشىلىق. ويتكەنى، دارىگەرلەردىڭ كوبى تاجىريبە جيناعان سوڭ، وزگە قىزمەتكە اۋىسىپ كەتەتىن كورىنەدى. سونداي-اق تۇرعىندار تاراپىنان فەلدشەرلەرگە قوقان-لوقى كورسەتۋ دەرەكتەرى دە ورىن الادى ەكەن. ماسەلەن، بيىلدىڭ وزىندە جەدەل جاردەم قىزمەتىنىڭ 3 دارىگەرىنە شابۋىل جاسالعان.
