ەلىمىزدە 2 مىڭ 67 ۇلى وتان سوعىسىنىڭ ارداگەرى بار. ونىڭ، ياعني، 369-ى الماتى قالاسىندا تۇرادى. ۇلى جەڭىستىڭ 73 جىلدىعىنا وراي ولاردىڭ ءارقايسىسىنا داستۇرگە ساي ءبىر رەتتىك تولەم جاسالادى. استانادا ارداگەرلەرگە جارتى ميلليون تەڭگەگە دەيىن بەرىلەدى. شىعىس قازاقستانداعى ارداگەرلەردىڭ الاتىنى دا وسىنداي. سولتۇستىك قازاقستاندا ونىڭ كولەمى ەكى ەسە از. باتىستا بەرەتىن سىيلىق ءالى ناقتىلانباسا كەرەك. وتكەن جىلى باتىرلارىمىزعا ات جازىلعان ساعات تابىستالعان. ال قاراعاندى مەن پاۆلوداردا 150 مىڭ تەڭگە تاعايىندالىپتى. الماتىداعى مايدانگەرلەرگە بىلتىر 150 مىڭ تەڭگە ءبىر رەتتىك الەۋمەتتىك كومەك كورسەتىلسە، بيىل وعان تاعى 100 مىڭ تەڭگە قوسىلدى.

«ۇلى وتان سوعىسىنىڭ قاتىسۋشىلارى مەن مۇگەدەكتەرىنە كوممۋنالدىق قىزمەتتەرگە بايلانىستى تولەنەتىن 5،5 ايلىق ەسەپتىك كورسەتكىش كولەمىندەگى الەۋمەتتىك كومەك مولشەرى قازىرگى تاڭدا 6،5 ايلىق ەسەپتىك كورسەتكىش كولەمىندە ۇلعايدى»،-دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى الەۋمەتتىك تولەمدەر ءبولىمىنىڭ باس مامانى رۇستەم يسمايلوۆ.

جەڭىلدىكتەر مەن كەپىلدىكتەر جاعىنان ارداگەرلەرگە تەڭەستىرىلگەن تۇلعالار، سۇراپىل شايقاستا قايتىس بولعان جاۋىنگەرلەردىڭ جەسىرلەرى مەن اۋعانستانداعى سوعىستا قازا تاپقان اسكەري قىزمەتشىلەردىڭ وتباسىلارىنا بۇعان دەيىن 30 مىڭ تەڭگە كولەمىندە كومەك كورسەتىلسە، تاعى قوسىمشا 20 مىڭ تەڭگە تولەنەدى. بيىلدان باستاپ اتاۋلى الەۋمەتتىك كومەك جاڭا فورماتتا بەرىلە باستادى. كەدەيشىلىك شەگى 40 پايىزدان 50 پايىزعا دەيىن كوتەرىلدى. جىل باسىنان بەرى بۇل كومەك ءتۇرى 311 وتباسىعا كورسەتىلگەن.

«جان باسىنا شاققانداعى ورتاشا تابىسى 2 ەسە كۇنكورىس دەڭگەيىنەن اسپايتىن ازاماتتارعا 7،5 ايلىق ەسەپتىك كورسەتكىش كولەمىنەن 10 ايلىق ەسەپتىك كورسەتكىش كولەمىندە ۇلعايدى. ءورت نەمەسە تابيعي اپاتتىڭ سالدارىنان كورسەتىلەتىن الەۋمەتتىك كومەك قازىرگى كەزدە 100 ايلىق ەسەپتىك كورسەتكىش كولەمىنەن 200 ايلىق ەسەپتىك كورسەتكىش كولەمىندە ۇلعايدى»،-دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى الەۋمەتتىك تولەمدەر ءبولىمىنىڭ باس مامانى رۇستەم يسمايلوۆ