الماتىدا الاتاۋ مەن بوستاندىق اۋداندارىندا ءبىراز كوشەلەردىڭ اتاۋلارى وزگەرۋى مۇمكىن. اسىرەسە، كوپ قايتالاناتىن كوشە ەسىمدەرىنىڭ ورنىنا ءابىش كەكىلبايەۆ، ەركەعالي راحمادييەۆ، باتىرحان شۇكەنوۆ، فاريزا وڭعارسىنوۆا، موڭكە بي سەكىلدى تۇلعالاردىڭ ەسىمى بەرىلۋى مۇمكىن. مۇنداي ۇسىنىستى الماتى قالاسى تىلدەردى دامىتۋ باسقارماسى رەسپۋبليكالىق ونوماستيكا كوميسسياسىنا جولداماق. سونىمەن قاتار، جەر-سۋ اتاۋلارىن دا قالاداعى كوشەلەرگە بەرۋ قاراستىرىلىپ وتىر.

«وسى ۇسىنىلىپ وتىرعان تۇلعالار كوميسسيانىڭ وتىرىسىندا ءبىراۋىزدان قولدايدى دەگەن سەنىمدەمىز. نەگىزىنەن قازىرگى تاڭدا بىزدە باسىم اتاۋدى تاريحي جەر-سۋ اتاۋلارى مەن حالىققا جاقىن ءداستۇرلى اتاۋلار ۇسىنۋ ارنايى تاپسىرما بار، سونىڭ نەگىزىندە ءبىز كوبىنەسە جەر-سۋ اتاۋلاردى قايتا جاڭعىرتۋ، ءداستۇرلى اتاۋلاردى ۇسىنعانبىز»، -دەدى الماتى قالاسى تىلدەردى دامىتۋ باسقارماسى ونوماستيكا ءبولىمىنىڭ باسشىسى وتەپبەرگەن قۋاتباي ۇلى.

دالىرەك ايتساق، بوستاندىق اۋدانى "الاتاۋ" شاعىن اۋدانىنداعى ناۋرىز كوشەسى اتاۋىن وزگەرتۋى مۇمكىن.

شۇكەنوۆتىڭ ەسىمىن ماڭگى تاريحتا قالدىرۋ تۋرالى بۇل يدەيا ءماسليحاتتىڭ الەۋمەتتىك-مادەني دامۋ بويىنشا تۇراقتى كوميسسياسى وتىرىسىندا ايتىلدى.

باتىرحان شۇكەنوۆ 2015 جىلى 29 ساۋىردە 53 جاسىندا ماسكەۋدە قايتىس بولدى. شىعارماشىلىق جولىن روزا رىمبايەۆامەن بىرگە ساكسوفونيست رەتىندە باستاعان باتىر 1988 جىلى "ا'ستۋديو" توبىن قۇردى. ال 2000 جىلدان باستاپ جەكە ءان ايتا باستادى.