«جۋرناليست بولعىم كەلەدى» تاقىرىبىنا جازىلعان ۇزدىك شىعارمانىڭ يەسى انىقتالدى. بۇعان دەيىن سۇلەيمان دەميرەل ۋنيۆەرسيتەتىنىڭ ءبىلىم گرانتىن جەڭىپ الۋ ءۇشىن بولاشاق تالاپكەرلەرگە كونكۋرس جاريالانعان ەدى. بايقاۋدىڭ ەكىنشى كەزەڭىندە ۇمىتكەرلەر كوميسسيا مۇشەلەرىمەن كەزدەسىپ، ەركىن سۇحبات وتكىزدى. سۇلەيمان دەميرەل ۋنيۆەرسيتەتىنىڭ ءبىلىم گرانتىنا كىم يە بولدى؟

بايقاۋ فيناليستەرىنىڭ جۇزدەرىنەن قوبالجۋ بايقالمايدى. تەك ءسال شىدامدىلىق تانىتىپ، ۋنيۆەرسيتەت قابىرعاسىندا كىمنىڭ تەگىن ءبىلىم الاتىنىن ءبىلۋ عانا قالدى. مەكتەپ ءبىتىرۋشى تۇلەكتەردەن 348 ەسسە كەلىپ تۇسكەندە، ۇيىمداستىرۋشىلاردىڭ وزدەرى تاڭداي قاققان.  قاتىسۋشىلار ەلىمىزدىڭ تۇكپىر-تۇكپىرىنەن كەلگەن. ءادىلقازىلار القاسى الدىمەن شىعارمالاردىڭ اراسىنان 23ء-ىن ىرىكتەپتى.

«تۇلەكتەر تاراپىنان وسىنشا ادام قاتىسادى دەپ ويلاعان ەمەسپىز. ءجۇز شاقتى ادام قاتىسادى دەپ پايىمداعان ەدىك. دەگەنمەن «الماتى» تەلەارناسىنىڭ دەڭگەيى مەن اتقارعان جارنامالاۋ جۇمىستارى بۇل ماماندىققا دەگەن سۇرانىستىڭ بار ەكەندىگىن دالەلدەدى»، - دەدى سۇلەيمان دەميرەل ۋنيۆەرسيتەتىنىڭ رەكتورى قانات قوجاحمەت.

قاتارلاستارىنان وق بويى وزا شاپقان استانالىق وقۋشى لەسقالي ارۋجان ۋنيۆەرسيتەتتىڭ ءبىلىم گرانتىنا يە بولدى. كوميسسيا مۇشەلەرىنىڭ كوڭىلىنەن شىققان ول ەسسەنى بولاشاق قىزىنىڭ اتىنان جازىپ، ەرەك دەپ تانىلعان.

«ءۇش اپتا بويى ويلانىپ، تولعانىپ، جۇرەگىمدەگىنىڭ بارلىعىن شىعارىپ، ەرەكشە جەتكىزىپ، ەسسەمدى جىبەردىم. تاقىرىبى: جۋرناليست بولعىم كەلەدى. كەز كەلگەن سۇراققا ماردىمدى جانە ناقتى جاۋاپ بەرە الۋ، ول - ءجۋرناليستتىڭ باستى قاسيەتى»، - دەدى بايقاۋ جەڭىمپازى ارۋجان لەسقالي.

بايقاۋ فيناليستەرىنە سەرتيفيكاتتار تابىستالسا، ەكىنشى جانە ءۇشىنشى ورىن يەلەگەندەرگە باعالى سىيلىقتار بەرىلدى. ۋنيۆەرسيتەتتىڭ ءبىلىم گرانتىن جەڭىپ العان بولاشاق مامان «الماتى» تەلەارناسىندا تاجىريبەسىن جەتىلدىرىپ، كاسىبي بىلىكتىلىگىن شىڭداي الادى. ايتا كەتەيىك، بۇل سۇلەيمان دەميرەل ۋنيۆەرسيتەتى مەن «الماتى» ارناسىنىڭ العاشقى بىرلەسكەن جوباسى ەمەس. قىركۇيەك ايىنان باستاپ، تەلەارنا بازاسىندا جۋرناليستيكا اكادەمياسى ءوز جۇمىسىن باستايدى. وندا بولاشاق ماماندار تىلشىلىك ءومىردىڭ تىرشىلىگىن جان-جاقتى ۇيرەنەتىن بولادى.  

«سۇلەيمان دەميرەل ۋنيۆەرسيتەتىمەن بىرىگە ءبىز ەكى جوبانى قولعا الدىق. ونىڭ ءبىرى وسى بايقاۋ بولسا، ەكىنشىسى ۋنيۆەرسيتەتتىڭ دۋالدى ءبىلىم جۇيەسىن پايدالانۋعا باعىتتالعان. بۇل قازاقستانداعى جۇزەگە اسىرىلعالى وتىرعان ءبىرىنشى جۇمىس. ياعني، بەلىم بەرۋ پروسەسىنىڭ ءبىر بولىگى ۋنيۆەرسيتەت قابىرعاسىندا، جارتىسى "الماتى" تەلەارناسىنىڭ بازاسىندا جۇزەگە اسادى. قىركۇيەك ايىنان باستاپ جۋرناليستيكا اكادەمياسى ءوز جۇمىسىن باستايدى»، - دەدى «الماتى» تەلەارناسىنىڭ باس ديرەكتورى الىبەك الدەنەي.

ۇيىمداستىرۋشىلار «جۋرناليست بولعىم كەلەدى» بايقاۋىن داستۇرگە اينالدىرماق نيەتتە. وعان بايقاۋعا ۇمىتكەرلەردىڭ كوپ بولۋى سەبەپ بولعان.  ايتا كەتەيىك، بيىلعى شارا قازاق تەليەۆيزياسىنىڭ 60 جىلدىعىمەن تۇسپا-تۇس كەلىپ وتىر.