الماتىداعى كۇلاش بايسەيىتوۆا اتىنداعى دارىندى بالالارعا ارنالعان مەكتەپكە 70 جىل تولدى. وسىعان وراي، ءبىلىم وشاعىنىڭ وقۋشىلارى مەرەيتويعا ارناپ كونسەرت وتكىزدى. تالاي ساڭلاقتار شىققان ونەر ورداسىن 2 مىڭنان استام بالا بىتىرگەن. ونىڭ مىڭ جارىمدايى ءتۇرلى حالىقارالىق دەڭگەيدەگى كونكۋرستاردىڭ جەڭىمپازدارى اتانعان.

70 جىلدىق تاريحى بار ءبىلىم بەرۋ مەكەمەسىنەن اتتارى الەمگە ايگىلى كومپوزيتورلار، داڭقى دۇنيەجۇزىنە تانىلعان ديريجەرلەر جانە مەملەكەتتىك دارەجەدەگى قىزمەتكەرلەر تۇلەپ ۇشقان. قازاقتىڭ ماڭدايىنا بىتكەن جارىق جۇلدىزداردى تاربيەلەگەن ونەر ورداسىنىڭ مەرەيتويىمەن قوس مينيسترلىك قۇتتىقتاپ، 10 ۇستازعا «ءبىلىم بەرۋ ءىسىنىڭ ۇزدىگى» جانە «مادەنيەت سالاسىنىڭ ۇزدىگى» توسبەلگىلەلەرىن تابىستادى.

«قازاقستان مۋزىكا مادەنيەتىنىڭ دامۋى مەن وركەندەۋىنە قوسقان سىزدەردىڭ ۇلەستەرىڭىز وراسان زور. شىعارماشىلىق جانە كاسىبي شەبەرلىگى وتە جوعارى دەڭگەيدەگى ايگىلى پەداگوگيكالىق ۇجىم جاس دارىندى مۋزىكانتتاردى دايارلاۋ جولىندا ۇلكەن جەتىستىكتەرگە جەتتى»،-دەدى ق ر مادەنيەت جانە سپورت ۆيسە-مينيسترى اقتوتى رايىمقۇلوۆا.

مەرەكەلىك كونسەرتتە مەكتەپتىڭ ەسترادا-سيمفونيالىق جانە قازاق حالىق اسپاپتار وركەسترى، انسامبلدەر مەن وقۋشىلار حورى ونەر كورسەتتى. وسىلايشا باس-اياعى 300-دەن استام بالا ءتۇرلى اسپاپتاردىڭ قۇلاعىندا وينايتىندىقتارىن كوپ الدىندا دالەلدەدى.

مەكتەپ تۇلەكتەرىنىڭ اراسىندا ەسىمى ەلگە تانىلىپ قالعان مۋزىكانتتار دا بار. ولاردىڭ ونەر جولىندا ەر جەتۋىنە كۇلاش بايسەيىتوۆا اتىنداعى مەكتەپتىڭ زور ىقپالى تيگەن. ولار ءدال وسى ءبىلىم بەرۋ مەكەمەسىن بىتىرگەندەرىن ماقتان تۇتادى.

«كىشىگىرىم مەكتەپ ۇلكەن ومىرگە دەگەن كوپتەگەن ساباقتارىن ءبىلىپ بەرىپ جانە دە مەنىڭ ويىمشا وسى بايسەيىتوۆ مەكتەبىندە مەن وقىماسام مەن مۇمكىن مۇلدە ساحناعا شىقپاس ەدىم. دەگەنمەن ءبىرىنشى ماماندىق بويىنشا كلاسسيكالىق ءپيانيستپىن. پيانيست بولماسام دا، بارلىق مۋزىكالىق ءبىلىم جانە  مۋزىكالىق ساۋاتتىلىق دەگەندە ونىڭ ءبارىن تەك قانا سول مەكتەپتە بەرەدى دەپ ويلايمىن»،-دەدى ءانشى ءالي وقاپوۆ.

«بۇل مەكتەپ مەنىڭ، قيىن اسپاپ سانالاتىن، سكريپكادا كاسىبي دەڭگەيدە ويناۋىما ءوز ۇلەسىن قوستى. ەلىمىزدىڭ مۋزىكا سالاسىن دامىتۋ ءۇشىن ايانباي ەڭبەك ەتىپ جۇرگەن قايراتكەرلەر وقىتقان، ومىرلىك ساباق بەرگەن ءبىلىم ورداسى ارى قاراي وركەندەي بەرسىن!»،-دەدى قازاقستاننىڭ ەڭبەك سىڭىرگەن قايراتكەرى ءجاميلا سەركەبايەۆا.

1948 جىلى اشىلعان ءۇش تىلدە ءبىلىم بەرەتىن مۋزىكا مەكتەبى 480 وقۋشىعا شاقتالىپتى. ال ەلىمىزدىڭ ءار وڭىرىنەن ارمان قۋىپ كەلەتىن جەتكىنشەكتەرگە وقۋ ورداسى جانىنان 110 ورىندىق ينتەرنات قاراستىرىلعان. ءبىلىمى مەن مۋزىكاعا ەرەكشە قابىلەتى بار دارىندى بالالارعا 187 پەداگوگ ءدارىس بەرەدى.

«ءاربىر دارىندى بالا ءبىز ءۇشىن التىن شىعاتىن جەر، مۇناي شىعاتىن جەر مەملەكەتكە قانداي بايلىق بولسا، دارىندى بالا دا سونداي دەڭگەيدە ءبىزدىڭ ەلىمىزدىڭ بايلىعى. ۇجىمىمىزدا بىلىكتى ماماندار قىزمەت ىستەيدى مىنا دارىندى بالالارمەن. دارىندى بالالاردى وقىتۋ وتە جاۋاپتى. ومىرگە دارىندى بولىپ كەلگەن بالانى وقىتۋ، ونى قالىپتاستىرۋ وتە جاۋاپتى جۇمىس»،-دەدى كۇلاش بايسەيىتوۆا اتىنداعى دارىندى بالالارعا ارنالعان رممومي رمم ديرەكتورى وقان ابدۋللايەۆ.

 ايتا كەتەيىك، ەندى جۋىق ارادا مەكتەپكە قاراما-قارسى بەتتەن بىرىككەن ۇلتتار ۇيىمىنىڭ حابى اشىلادى. بۇل اتى الەمگە ايگىلى مەكتەپ تۇرعان اۋداندى كوركەيتۋگە سەپ بولماق.