قالانىڭ تىرلىگى شارشاتقان حالىقتى الداعى دەمالىس كۇندەرىنە قىزىقتى شارالار كۇتەدى. كيىز ءۇي مەرەكەسى، سىبىزعى كونسەرتى جوسپارلانعان. ودان بولەك، كارىس ۇلتىنىڭ مادەنيەتىمەن تانىسۋ مۇمكىندىگى جاسالماق.

الماتىنىڭ ارباتى ناعىز ەتنواۋىلعا اينالماق. قالادا ەكىنشى رەت «كيىز ءۇي مەرەكەسى» اتاپ وتىلەدى. ەرەكشە شارا ەكى كۇنگە جالعاسادى. ۇلتتىق ءداستۇر ادەت-عۇرىپتى جاڭعىرتۋدى كوزدەگەن شارا ەرتەڭ باستاۋ الماق. ونىڭ اياسىندا الماتىلىقتار كيىز ءۇي تىگۋ بارىسىمەن تانىسىپ، ونى ورناتۋدىڭ ءتارتىبى مەن ەرەكشەلىكتەرىن ۇيرەنە الادى.

شارا كوركىن ورتالىق ازيادان جيىلعان شەبەرلەر، زەرگەرلەر مەن تىگىنشىلەر اشا تۇسپەك.وعان قوسا، الماتىلىقتار كيىز باسۋدىڭ ادىس-تاسىلىنە قانىعا الادى. سونداي-اق ارقان تارتىس، توعىزقۇمالاق سىندى قازاقتىڭ ۇلتتىق ويىندارى ويناتىلىپ، كوڭىلدى سەرپىلتە تۇسپەك.

ال ستۋدەنتتەر سارايىندا كورەي مادەنيەتىنىڭ فەستيۆالى وتپەك. ونەرپازدار ەكى مىڭ جىلدىق تاريحى بار تاڭسامالى ەلىنىڭ ءسالت-داستۇرى مەن ونەرىن تانىتادى. ۇلتتىق اسپاپتار سالتانات قۇرعان كونسەرتتە ءداستۇرلى مۋزىكا اۋەلەپ، حالىق اندەرى تامىلجىتا شىرقالماق. مىڭ بۇرالعان بيشىلەر كونە جانە زامانۋي بي قيمىلدارىمەن كەش كوركىن اشا تۇسپەك. تامىرى تەرەڭدە جاتقان سالت-سانادان سىر شەرتەر تەاترلاندىرىلعان قويىلىمدار ۇسىنىلادى.  

كلاسسيكالىق ءاندى جانى سۇيەتىندەر ءۇشىن جامبىل اتىنداعى قازاق مەملەكەتتىك فيلارمونياسىندا سىبىزعى كونسەرتىنىڭ كەشى ۇيىمداستىرىلماق. كەشكى ساعات التىدا باستالاتىن كونسەرتتە ۇلى كومپوزيتورلاردىڭ اتاقتى شىعارمالارى ورىندالادى. ونەرسۇيەر قاۋىم نازارىنا الەمدىك مۋزىكا تاريحىندا سۇبەلى ۇلەسى مول ءاربىر تۋىندىنىڭ وزىنە ءتان اۋەن ىرعاعى بار، ورىندالۋى دا ەرەكشە.

19 مامىردا «الاش» سپورت كەشەنىندە ءتۇرلى تۇقىم يتتەرىنىڭ كورمەسى وتپەك. قالا تۇرعىندارى مەن قوناقتارى قازاقتىڭ تازىسىنان باستاپ، ءسىبىر حاسكيى، لابرادور، رەتريۆەر، نەمىس وۆچاركاسى جانە تاعى دا باسقا اسىل تۇقىمدى يتتەردى كورە الادى. فۋتبول جانكۇيەرلەرى ءۇشىن دە ورتالىق ستاديوندا ەرەكشە ويىن وتەدى. الماتىلىق قايرات پەن قاراعاندىنىڭ «شاحتەر» كوماندالارى سايىسادى. دەمالىس كۇنىنە جوسپارلانعان مادەني شارالار توپتاماسى وسى. دەمالىستارىڭىز ءماندى، ءارى ءساتتى ءوتسىن.