ورتا سالماقتاعى WBC بەلبەۋىنىڭ ۋاقىتشا چەمپيونى دجەرمالل چارلو (27-0، 21 كو) The Ring باسىلىمىنا بەرگەن سۇقباتىندا وسى سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى گەنناديي گولوۆكين ساۋل "كانەلو" الۆارەسپەن (49-1-2، 34 كو) قىركۇيەك ايىندا جەكپە-جەك وتكىزۋگە كەلىسە الماسا، قازاقستاندىقتىڭ ورنىن باسا الاتىنىن ايتتى، دەپ جازادى vesti.kz. 

بۇعان دەيىن مەكسيكالىق بوكسشىنىڭ پروموۋتەرى وسكار دە لا حوييا جەكپە-جەكتى ۇيىمداستىرۋ بارىسىندا گولوۆكيننىڭ كومانداسىمەن ءبىر قيىندىقتاردىڭ شىققانىن ايتىپ ەدى. ونىڭ ايتۋىنشا، گولوۆكين ولار ۇسىنىپ وتىرعان شارت بويىنشا جۇدىرىقتاسقىسى كەلمەيدى ەكەن. سوندىقتان دە لا حوييا باسقا قارسىلاس قاراستىرۋعا دايىن. ولاردىڭ قاتارىندا چارلو بار.

"جاقسى بولار ەدى. مەن "كانەلومەن" كەزدەسۋگە دايىنمىن. ەگەر بۇل ۇسىنىس مەنىڭ كوماندامنىڭ كوڭىلىنەن شىقسا، ءبىز كەلىسىم بەرەمىز. قازىرگى ۋاقىتتا مەن دايىنمىن. مەنىڭ كوماندام مۇنداي جۇمىستاردى جاقسى اتقارا الادى. وسكار مەنىمەن كەزدەسۋدىڭ قارجىلاي ۇسىنىسىن كەلىسسىن. بارلىعى شەشىلەدى دەپ ۇمىتتەنەمىن"، - دەيدى چارلو. 

ءوز كەزەگىندە گولوۆكيننىڭ پروموۋتەرى توم لەففلەر بولسا "كانەلومەن" كەزدەسۋدەن باس تارتپاعانىن حابارلادى. ونىڭ ايتۋىنشا، گولۆكين گولوۆكين ەكىنشى كەزدەسۋ ءۇشىن شامالى كوبىرەك اقشا العىسى كەلەدى ەكەن. سەبەبى، ول "كانەلونى" ۇزاق كۇتىپ قالعان. 

ەسكە سالايىق، 21 ءساۋىر كۇنى چارلو ەكىنشى راۋندتا وتانداسى كىشى ۋگو سەنتەنونى (26-2، 14 كو) جەڭىپ، گولوۆكيننىڭ مىندەتتى قارسىلاسى اتاندى. كەزدەسۋدەن كەيىن دجەرمالل وتانداسىمىزدى جەكپە-جەككە شاقىردى.