مەرەيتويى وتكەن جىلدىڭ 10 جەلتوقسانىندا باستالعان  استانا قالاسىنىڭ 20 جىلدىعىن مەرەكەلەۋ اياسىندا تەڭگە ءىلۋ جانە اۋدارىسپاقتان ازيا چەمپيوناتتارى وتەدى. بۇل تۋرالى مادەنيەت جانە سپورت مينيسترلىگى اقپارات تاراتتى. ايتا كەتسەك استانا مەرەيتويىنا استانانىڭ وزىندە 630 ءىس-شارا وتەدى دەپ جوسپارلانعان.

استانانىڭ 20 جىلدىق مەرەيتويى قارساڭىندا، "رۋحاني جاڭعىرۋ" باعدارلاماسى اياسىندا ماۋسىم ايىنىڭ 1-2 كۇندەرى استانادا تەڭگە ىلۋدەن ءىى ازيا چەمپيوناتى، اۋدارىسپاقتان ءىىى ازيا چەمپيوناتى وتكىزىلمەك. 

بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى ۇلتتىق سپورتتى دامىتۋ بويىنشا ارنايى ءماجىلىس وتكىزىپ، بايراقتى باسەكەنىڭ دايىندىعىن پىسىقتادى. ماجىلىسكە ق ر مادەنيەت جانە سپورت ۆيسە-مينيسترى ساكەن مۇسايبەكوۆ، ق ر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك جاراسبايەۆ جانە چەمپيوناتتاردىڭ وتكىزىلۋىنە جاۋاپتى مەكەمەلەردىڭ ماماندارى قاتىستى. 

قوس بىردەي حالىقارالىق ۇلتتىق سپورت باسەكەلەرىندە ازيانىڭ ونعا جۋىق مەملەكەتىنىڭ سپورتشىلارى ب ا ق سىناماق. 

«وسىنداۋ ماڭىزدى داتا قارساڭىندا ءبىزدىڭ ۆەدومستۆو مادەني شارالارمەن بىرگە، سپورتتىق سايىستاردى دايارلاپ جاتىر. 31 مامىردان 2 ماۋسىم ارالىعىندا سىزدەردى «قازانات» يپپودرومىندا ۇلتتىق سپورت تۇرلەرى بويىنشا وتە تارتىمدى شارالار كۇتىپ تۇر. اتاپ ايتقاندا، تەڭگە ىلۋدەن ءىى ازيا جانە اۋدارىسپاقتان ءىىى ازيا چەمپيوناتتارى وتەدى»، - دەپ مالىمدەدى مينيستر ارىستانبەك مۇحامەدي ۇلى.

اتالعان سپورتتىق شارالارعا يۋنەسكو-نىڭ  ءداستۇرلى سپورتتار مەن ويىندار كوميتەتى  وكىلدەرىنىڭ قاتىسۋى جوسپارلانعان.

«تەڭگە ءىلۋ جارىسىنا  7 ەلدەن سپورتشىلار كەلەدى، ياعني ولاردىڭ اراسىندا تۇركيا، رەسەي، وزبەكستان، قىرعىزستان، تاجىكستان، اۋعانستان مەن موڭعوليا بار. ال اۋدارىسپاق سايىسىنا 9 مەملەكەتتىك سپورتشىلارى ەلىمىزگە ساپارلايدى. شەتەل تاراپىنان وسىنداي چەمپيوناتتارعا قىزىعۋشىلىق جوعارى»، - ا. مۇحامەدي ۇلى.

ونىڭ اتاپ وتۋىنشە، تەڭگە ىلۋدەن ءىى ازيا جانە اۋدارىسپاقتان ءىىى ازيا چەمپيوناتتارىنىڭ جالپى جۇلدە قورى - 14 000 000 تەڭگە.

ەستەرىڭىزگە سالا كەتەيىك، اۋدارىسپاقتان I ازيا چەمپيوناتى 2014 جىلى استانادا، II ازيا چەمپيوناتى 2016 جىلى قىتايدا وتكەن بولاتىن. ال  تەڭگە ىلۋدەن I ازيا چەمپيوناتى استانادا 2015 جىلى ۇيىمداستىرىلدى.

مەرەيتوي اياسىندا ماۋسىمنان قىركۇيەككە دەيىن ەتنواۋىل مادەني كەشەنى قايتا اشىلادى، وندا «الپامىس»، «شكولا تراپەسيي» اتتى تەاتر-سيرك شوۋى ۇيىمداستىرىلادى. مەرەيتويعا الەمنىڭ جەتەكشى شىعارماشىلىق ۇجىمدارى مەن ۇيىمدارىنىڭ قاتىسۋىمەن «استانالار شەرۋى» اتتى اۋقىمدى حالىقارالىق جوبا، تانىمال ارتىستەر مەن 20 ەلدىڭ بەلگىلى سپورتشىلارى قاتىسادى. جوبا اياسىندا الەمگە ايگىلى رەجيسسەر تيمۋر بەكمامبەتوۆتىڭ باسشىلىعىمەن «استانا وپەرا» مەن دج. پۋچچيني «تۋراندوت» پەكين ۇلتتىق وپەراسىنىڭ بىرلەسكەن شىعارمالارى وتەدى.

ءيا، قازاق ۇلتىنىڭ ۇلى تۇعىرى، الاش جۇرتىنىڭ اسقاق ايبارى – ارۋ استاناعا 20 جىل! تاريح ءۇشىن قاس-قاعىم ءسات. ءبىراق مىناۋ وزگەرىستەر ولشەمى كوز ىلەسپەس جىلدامدىقپەن جارىسقان بۇگىنگى كەزەڭ ءۇشىن از ۋاقىت تا ەمەس سياقتى. قالاي بولعاندا دا، وسى ۋاقىت ولشەمىنىڭ ىشىندە قازاقستان حالقىنىڭ ەرەن ەڭبەگىنىڭ ناتيجەسىندە الەمنىڭ اتاقتى استانالارىمەن سالتانات جاراستىرىپ، كوركىمەن دە، كولەمىمەن دە بوي تالاستىرا الاتىن قازاق جۇرتىنىڭ جاس تا باس قالاسى قالىپتاستى. وسىدان تۋرا 24 جىل بۇرىن استانانى اۋىستىرۋ يدەياسى العاش جاريا ەتىلگەندە، بۇل تىم «ۇشقارى» پىكىردىڭ قاپتاعان قارسىلاستارى تۇگىل، ات توبەلىندەي جاقتاستارى دا اينالاسى 20 جىلدىڭ ىشىندە ەل كىندىگى – ارقا توسىندە وسىنداي زاماناۋي مەگاپوليس بوي كوتەرەدى دەپ ويلاماعان ەدى.