الماتىدا تاعى دا دابىل قاعىلدى. بۇل الىپ شاھاردا وتكەن كەزەكتى سەيسموجاتتىعۋ دابىلى بولاتىن. قالانىڭ قۇتقارۋ قىزمەتتەرى جەر سىلكىنىسى بولعان كۇندە نە ىستەۋ كەرەكتىگىن پىسىقتادى. بۇگىنگى جاتتىعۋعا 150-دەي مەكەمە قاتىستى. ال ماڭىزدى شارانى قالا اكىمى باۋىرجان بايبەك ءوزى قاداعالادى.

سەناريي بويىنشا اپات دابىلىن ەستىگەن ستۋدەنتتەر وقۋ كورپۋسىنان جاپپاي سىرتقا ۇمتىلدى. ءقاۋىپسىز ايماققا كەلگەندەر بىردەن قاسىنداعى دوستارىن تۇگەندەي باستادى. ەكى ادامنىڭ عيماراتتا قالىپ قويعانى انىقتالدى. ونى توپ باسشىسى قولىنداعى قىزىل ءتۇستى بەلگىمەن كورسەتتى. ال ەگەر جاسىل بەلگى بولسا، وندا كۋرستاستار تۇگەل دەگەندى بىلدىرەدى. سونىمەن قۇتقارۋشىلار ءزىلزالادان زارداپ شەككەندەرگە كومەكتەسۋ ءۇشىن نىسان ىشىنە قاراي اسىقتى. بەلگىلى بولعانداي، قوس ازامات تا اۋىر جاراقات الىپتى. ولارعا بىردەن العاشقى كومەك كورسەتىلدى. الماتى اكىمى توتەنشە جاعدايدا قورعانۋدىڭ العىشارتتارىن جادىدا ساقتاۋ كەرەكتىگىن ايتتى.

كوللەدجدە باستالعان سەيسموجاتتىعۋ مەكتەپتە جالعاستى. مۇندا توتەنشە جاعدايلار دەپارتامەنتى ماماندارى ءزىلزالا كەزىندە قۇتقارۋعا قاجەتتى تەحنيكانى جانە جابدىقتاردى قالا اكىمى باۋىرجان بايبەككە كورسەتتى. مۇندا قاجەتتى كيىم-كەشەك، ۇزاق ۋاقىت بۇزىلماي تۇراتىن تاعامدار، شاتىرلار مەن جاتىن ورىندار بار. ايتا كەتەيىك، ءار كەز دايىن تۇرۋى ءتيىس شاباداننىڭ ىشىندە ءجىپ، ورتكە قارسى قولباق، جاڭبىردان قورعايتىن شەكپەن، قاجەتتى دارى-دارمەك، راديو، شام، كومەك شاقىرۋعا ىسقىرىق، سۋ بولعانى ابزال -  دەيدى قىزىل جارتى اي قوعامىنىڭ ەرىكتىلەرى.

«ءدارى قوبديشاسىن ءار ادام ءوز قاجەتتىلىگىنە قاراي تولتىرادى. مەزگىلگە بايلانىستى كيىم-كەشەكتەر جانە مىندەتتى تۇردە تابانى بيىك اياق-كيىم بولعانى دۇرىس. ويتكەنى، جەر سىلكىنىسىنەن كەيىن قيراندىلار اراسىندا ءجۇرۋ جەڭىل بولادى. ءبىزدىڭ سومكەدە فولگادان جاسالعان ورانعىش بار. ول قىستا سۋىقتان، جازدا ىستىقتان ساقتايدى»، - دەدى  قازاقستان قىزىل جارتى اي قوعامىنىڭ ۇيلەستىرۋشىسى رۋسلان حرۋششيەۆ.

 جاساندى توتەنشە جاعدايدى ۇيىمداستىرعان قالانىڭ قۇتقارۋ قىزمەتتەرى تابيعي اپاتتىڭ ايتىپ كەلمەيتىندىگىن، سوندىقتان ءزىلزالاعا بارىنشا دايىن بولۋ كەرەكتىگىن جاقسى بىلەدى. بيىل وسىنداي سەيسموجاتتىعۋلار قالانىڭ باسقا دا اۋداندارىندا جالعاسادى. اسىرەسە، حالىق كوپ شوعىرلاناتىن نىسانداردا جۇرگىزىلمەك.

«سەيسموجاتتىعۋدى ۇيىمداستىرۋداعى ماقساتىمىز - قۇتقارۋ قىزمەتىندەگى مامانداردىڭ دايىندىعىن پىسىقتاۋ. وعان قوسا، حالىقتى ءزىلزالا كەزىندە دۇرىس ارەكەت ەتۋگە ۇيرەتۋىمىز كەرەك. ماسەلەن، بۇگىن قالانىڭ جولاۋشىلار كولىگى باسقارماسىمەن بىرىگىپ، ءزىلزالا ورىن العان جەردەن ادامداردى وزگە وبلىستارعا جەتكىزۋ ءۇشىن تەمىرجول ۆوزكالدارىنا تاسۋ ارەكەتىن دە وتكىزدىك»، - دەدى  الماتى قالاسى تجد ازاماتتىق قورعانىس باسقارماسىنىڭ باسشىسى قالىمبەك اقبۇزاۋوۆ.

الماتى اكىمى باۋىرجان بايبەك حالىق توتەنشە جاعدايلار كەزىندە ناقتى ارەكەت ەتىپ، ءتيىستى ەرەجەلەردى ۇمىتىپ قالماۋ ءۇشىن جاڭا اقپاراتتىق جادىناما دايىنداۋدى تاپسىردى. ونى بارلىق تۇرعىن ۇيلەر مەن جارنامالىق قۇرىلىمدارعا ءىلۋ جوسپارلانىپ وتىر.