الماتىدا ريەۆماتولوگيالىق اۋرۋلاردى ەمدەۋدىڭ زاماناۋي تاسىلدەرى تالقىلاندى.

الماتى قالالىق ريەۆماتولوگيا ورتالىعىنىڭ 10 جىلدىعىنا وراي حالىقارالىق عىلىمي-تاجىريبەلىك كونفەرەنسيا ءوتتى. جيىن بارىسىندا ريەۆماتولوگيالىق اۋرۋلاردى ەمدەۋدىڭ زاماناۋي تاسىلدەرى تالقىلاندى. سونىمەن قاتار، 100-دەن استام ريەۆماتولوگ دياگنوستيكالاۋ، ناۋقاستاردى وتاعا دايىنداۋ سىندى ماڭىزدى ماسەلەلەردى ءسوز ەتتى. رەسەيدەن ارنايى كەلگەن ماماندار دا ءوز تاجىريبەلەرىمەن ءبولىستى.

«مەن قازاقستانداعى ارىپتەستەرىمدى 10 جىلدىق مەرەيتويمەن قۇتتىقتاعالى كەلدىم. بۇل - الماتىداعى 5 جارىم مىڭنان اسا ناۋقاسقا مەديسينالىق كومەك كورسەتىپ وتىرعان ماڭىزدى ورتالىق. رەسەيدىڭ ريەۆماتولوگيا قاۋىمداستىعى مەن ناسونوۆا اتىنداعى ريەۆماتولوگيا ينستيتۋتى الماتىداعى ورتالىقپەن بۇرىننان تىعىز بايلانىستا جۇمىس ىستەيدى. ءبىز ءالى كۇنگە دەيىن دوستىق قارىم-قاتىناستامىز، ۇنەمى عىلىمي يدەيالارىمىزبەن ءبولىسىپ، كەيبىر اۋىر ناۋقاستارعا قاتىستى كەڭەس الىپ وتىرامىز»، - دەدى ماسكەۋ قالاسى ناسونوۆا ۆ.ا. اتىنداعى فبنۋ ريەۆماتولوگيا عزي، عىلىمي حاتشىسى ۆەرا اميردجانوۆا(رەسەي).

كونفەرەنسيا بارىسىندا ريەۆماتولوگيا سالاسىنىڭ دامۋىنا ۇلەس قوسىپ جۇرگەن عالىمدار مەن بىلىكتى دارىگەرلەر ماراپاتتالدى. الماتىداعى ورتالىق ەلىمىزدەگى جالعىز مەكەمە بولعاندىقتان مەملەكەتتەن دە قولداۋ جاقسى. ماسەلەن، بيىل تەك قالالىق بيۋدجەتتىڭ وزىنەن 800 ملن تەڭگەدەن اسا قارجى بولىنگەن.

«رەسپۋبليكا بويىنشا وسى ورتالىق ناۋقاستارعا ستاسيونارلىق كومەك كورسەتىپ وتىر. مەديسينالىق تەحنولوگيالار وسى ءبىزدىڭ ورتالىق ارقىلى قازاقستانعا تاراپ وتىر. كەلەشەكتەگى ءبىزدىڭ ويىمىز - وسىنداي ورتالىقتار قازاقستاننىڭ بارلىق وبلىس ورتالىقتارىندا اشىلۋى كەرەك. ويتكەنى، اۋرۋلاردىڭ سانى كوبەيىپ جاتىر، ولارعا ءوز ايماقتارىندا ءتيىستى كومەك كورسەتىلۋى ءتيىس»، - دەدى الماتى قالاسى دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ.