"قازپوشتا" باسشىلارى بۇل تاجىريبەنى ءارى قاراي جالعاستىرىپ، قازاقستاننىڭ ءتورت وبلىسىنا پوشتا درونىن تەستىلەۋدى جەتىلدىرە بەرەمىز دەيدى. ۇشقىشسىز ۇشاق تەست رەجيمىندە سەگىز اي بويىندا جۇمىس ىستەپ كەلەدى ەكەن. ءبىراق ونى جاساۋشىلار جاڭا مودەلدى ۇسىنعان. بۇل ەسكى مودەلدەن 80 شاقىرىمعا ۇزاق ۇشادى ءارى 4 كەلىگە دەيىن جۇكتى كوتەرە الادى.

"قازپوشتا" باسشىسى سەرىك سارسەنوۆ جاڭا اپپاراتتار گازەت پەن جۋرنالدار باسىلىپ شىققان كۇنى جازىلۋشىلارىنا دەر كەزىندە جەتكىزە الادى دەيدى. درونعا باسپادان جاڭا شىققان گازەتتەردى بىردەن جۇكتەيدى، ول دىتتەگەن جەرىنە بارىپ، اۆتوماتتى تۇردە تاۋاردى تاستايدى. سول جەردەن پوشتاشىلار جيناپ الادى.

"ءبىز ونىڭ ۇستىنە جاسىل تەحنولوگيانى دامىتىپ جاتىرمىز"،- دەيدى سارسەنوۆ.

"قازپوشتا" ءۇشىن درونداردى قازاقستاندىق Adrome Automation كومپانياسى جاساپ شىعارعان. ونىڭ باس ديرەكتورى الەكسەي كيم قۇرىلعىنى ءوزىمىز جينايمىز دەيدى. ونىڭ سوزىنشە، ءبىر دروننىڭ قۇنى 5 مىڭ دوللار تۇرادى.

ءساۋىر ايىنىڭ باسىندا "رەسەي پوشتاسى" دا ءبىرىنشى رەت تاۋاردى درونمەن جەتكىزبەك بولعان. سىناق حالقى از ءارى قاشىقتىقتا ورنالاسقان بۋرياتيادا ءوتتى. درون ەكى كەلى جۇكتى 60 شاقىرىم جەرگە جەتكىزۋ كەرەك بولعان. ءبىراق العاشقى سىناق كەزىندە اپپارات ءۇيدىڭ توبەسىنە قۇلاپ تۇسكەن.