ۆيدەو 2018 جىلدىڭ 1 مامىرىندا تۇسىرىلگەن.

سوڭعى كۇندەرى قىرعىزستان مەن قازاقستان الەۋمەتتىك جەلىلەرىندە ايەلدىڭ جاسقا دا كەلمەگەن ءسابيدى اياۋسىز سوققىعا جىققان ۆيدەوسى تارالعان.

ۆيدەودان ايەلدىڭ ءسابيدى تەپكىلەپ، جۇدىرىعىمەن ارقاسىنان ۇرعانىن انىق بايقاۋعا بولادى. ۆيدەوعا تۇسكەن ەكىنشى ايەل قولىنا پىشاق ۇستاپ تۇر، الايدا سۋىق قارۋمەن نە ىستەگەنى بەلگىسىز.

جازبا تاراعان ۋاقىتتا ق ر ءىىم ايەلدىڭ ىزدەستىرىلىپ جاتقانىن حابارلاعان. قىرعىزستان مينيسترلىگى دە ۆيدەوعا قاتىستى تەكسەرۋ جۇمىستارىنا كىرىسكەن.

قىرعىزستاندىق Kaktus.media بولعان وقيعاعا قاتىستى شاعىن زەرتتەۋ جۇرگىزىپ كوردى. ناتيجەسىندە ۆيدەونىڭ قىرعىزستان مەن قازاقستاندا تۇسىرىلمەگەنى انىقتالدى.

«ۆيدەو مونتاج ەمەس، شىنايى. جازبا 2018 جىلدىڭ 1 مامىرىندا تۇسىرىلگەن. وقيعا پەرۋدە ورىن الىپتى. العان جاراقاتتارىنىڭ كەسىرىنەن ءسابي قايتىس بولدى. ال ونى سوققىعا جىققان ايەل تۋعان اناسى بولىپ شىقتى. ۆيدەوعا ءتۇسىرىپ تۇرعان بالانىڭ اكەسى ەكەن»، - دەلىنگەن  Kaktus.media پورتالىنىڭ مالىمەتىندە.

پورتال دەرەكتەرىنە سايكەس، ۆيدەو پەرۋدەگى يۋنگايو قالاسىندا تۇسىرىلگەن. جاس اتا-انا پوليسيا بولىمشەسىنە 10 ايلىق ءسابيدىڭ ءولى دەنەسىن اكەلەدى. ەرلى-زايىپتىلاردىڭ سوزىنشە، بالا قاتتى اۋرىپ، اۋرۋحاناعا اپارا جاتقان جولدا كوز جۇمعان.

ال پوليسيا بولىمشەسىنە ءمايىتحاناعا جولداما بەرەتىن قۇجاتتاردى الۋعا بارعان كورىنەدى. پوليسەيلەر ءتيىستى قۇجاتتاردى تاۋىپ بەرگەنىمەن ەر مەن ايەلدەن كۇدىكتەنىپ، سۇراۋ استىنا الادى. تەرگەۋ ۋاقىتى ارالىعىندا ۆيدەو الەۋمەتتىك جەلىدە تاراپ ۇلگەرەدى. جازبا پوليسيانىڭ قولىنا جەتىپ، ەرلى-زايىپتىلار قاماۋعا الىندى.