تالعات رىسقۇلبەك باستاعان "جەلتوقسان رۋحى" قوعامدىق بىرلەستىگىنىڭ ءبىر توپ بەلسەندىسى نارحوز ۋنيۆەرسيتەتىنەن تۇرار رىسقۇلوۆتىڭ ەسىمىن الىپ تاستاۋعا قارسىلىق ءبىلدىرىپ، ۋنيۆەرسيتەت الدىنا شەرۋگە كەلدى. ولار قايراتكەردىڭ ەسىمىن جوعارى وقۋ ورنىنا قايتا بەرۋدى تالاپ ەتۋدە، دەپ جازادى Qamshy.kz اقپارات اگەنتتىگى. 

«بۇگىنگى جينالۋىمىزدىڭ سەبەبى – وسىدان بىرنەشە جىل بۇرىن مىنا نارحوز ۋنيۆەرسيتەتى ساتىلىپ كەتكەن ەكەن. كەيىننەن بۇل ۋنيۆەرسيتەتتەن تۇرار رىسقۇلوۆتىڭ اتىن الىپ تاستادى. بىلۋىمشە، 2016 جىلى الىنىپ تاستالدى. ءبىر قىزىعى، ۇكىمەتتىڭ قاۋلىسىمەن بۇل جوعارى وقۋ ورنىنا تۇرار رىسقۇلوۆتىڭ اتى بەرىلەدى دە، ال ونىڭ ەسىمىن الىپ تاستاعان كەزدە ەشقانداي دا قاۋلى شىقپايدى»، - دەيدى "جەلتوقسان رۋحى" قوعامدىق بىرلەستىگىنىڭ ءتوراعاسى تالعات رىسقۇلبەك.

نارحوز ۋنيۆەرسيتەتىنىڭ الدىنا جينالعان ءبىر توپ بەلسەندى ءوز شاعىمدارىن ايتىپ كەلگەنىمەن، جوعارى وقۋ ورنىنىڭ باسشىلىعى بولمادى.

«ەلباسىمىز «رۋحاني جاڭعىرۋ» دەگەن جاپ-جاقسى باستامانى كوتەردى. ءبىراق ءبىز قالاي رۋحاني جاڭعىرامىز؟ ەگەر دە وسىنداي ەلىن، جەرىن قورعاپ، حالقى ءۇشىن قۇربان بولعان ازاماتتاردىڭ ەسىمىن وسىلاي الىپ تاستاپ جاتسا. بۇل جوعارى وقۋ ورنىن ساتقان ادام، كەزىندە تۇرار رىسقۇلوۆتى ساتقان ادامنىڭ ۇرپاعى بولۋى مۇمكىن»، - دەيدى تالعات رىسقۇلبەك.