ۆۋلف ينستيتۋتى وكىلدەرىنىڭ قازاقستان رەسپۋبليكاسىنا رەسمي ساپارى بارىسىندا ق ر ءدىن ىستەرى جانە ازاماتتىق قوعام مينيسترلىگى جانىنداعى مادەنيەتتەر مەن دىندەردىڭ حالىقارالىق ورتالىعى جانە ۆۋلف ينستيتۋتى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.

اتالعان قۇجاتقا مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى ايدار ابۋوۆ پەن ۆۋلف ينستيتۋتىنىڭ ديرەكتورى ەدۆارد كەسسلەر قول قويدى.

مەموراندۋم جۇيەلى نەگىزدە زەرتتەۋ جۇمىستارى مەن تاجىريبە الماسۋعا، ءدىني سالادا وزەكتى ماسەلەلەر بويىنشا كونسۋلتاسيالار مەن بىرلەسكەن ءىس-شارالاردى وتكىزۋگە جانە وزەكتى ماسەلەلەر بويىنشا دارىستەر ۇيىمداستىرۋعا مۇمكىندىك بەرەدى. تاراپتار بۇدان باسقا، ءدىنارالىق ديالوگ پەن كەلىسىمدى، ءدىني بىرلەستىكتەردىڭ وكىلدەرى ءۇشىن ءبىلىم بەرۋ باعدارلامالارىن ىلگەرىلەتۋدە ىنتىماقتاستىقتى دامىتۋعا نيەتتى.

كەزدەسۋ بارىسىندا ف.ع.د.، پروفەسسور ايدار ابۋوۆ حالىقارالىق مادەنيەتتەر مەن دىندەر ورتالىعىنىڭ قىزمەتى تۋرالى باياندادى. ونىڭ ايتۋىنشا، ورتالىقتىڭ قىزمەتى حالىقارالىق دەڭگەيدە كونفەسسياارالىق كەلىسىم مەن ءدىنارالىق ديالوگتى نىعايتۋعا، الەمدىك جانە ءداستۇرلى دىندەر كوشباسشىلارىنىڭ سەزىن ۇيىمداستىرۋعا جانە وتكىزۋگە، سەزد حاتشىلىعى جانە جۇمىس توبىنىڭ وتىرىستارىن وتكىزۋدەگى قازاقستان رەسپۋبليكاسىنىڭ بىرەگەي تاجىريبەسىن ناسيحاتتاۋعا باعىتتالعان.

ۆۋلف ينستيتۋتىنىڭ ديرەكتورى ەدۆارد كەسسلەر ينستيتۋت جانىنان ءدىن جانە مادەنيەت ماسەلەلەرى بويىنشا 16 اپتالىق ءبىلىم بەرۋ باعدارلاماسىن قۇرۋدى، سونداي-اق، قازاقستانداعى ءدىني بىرلەستىك وكىلدەرىنە جازعى مەكتەپتى ۇيىمداستىرۋدى ۇسىندى.

كەزدەسۋ قورىتىندىسىندا تاراپتار ودان ءارى ىنتىماقتاستىقتى نىعايتۋعا جانە بەيبىتشىلىك پەن تولەرانتتىلىقتى دارىپتەۋدەگى ىقپالداستىقتى دامىتۋعا مۇددەلىلىك تانىتتى.

ايتا كەتەيىك، ۆۋلف ينستيتۋتى مۇسىلماندار، حريستياندار مەن يۋدەيلەر اراسىنداعى بايلانىستاردى اكادەميالىق تۇرعىدا زەرتتەۋدە جەتەكشى ورىن الادى. ول 1998 جىلى دوكتور ەدۆارد كەسسلەر مەن پروفەسسور مارتين فوردتىڭ باستاماسىمەن قۇرىلعان. ينستيتۋت الەمدە ءوزىنىڭ زەرتتەۋلىك، ساياسي، وقۋ-اعارتۋ جانە ءبىلىم باعدارلامالارى بويىنشا ۇزدىك دەپ تانىلعان ۇيىم.