ماقتارال اۋدانىنىڭ ەڭبەكقور ديقاندارى قاۋىن-قاربىزبەن قاتار كوكونىس ونىمدەرىن دە ەكسپورتقا شىعارا باستادى. قازىرگى تاڭدا اۋداندا ەرتە ەگىلگەن 350 گەكتار كوكونىس داقىلدارى ءپىسىپ جەتىلىپ، ەگىستىك القاپتارىندا تەرىم جۇمىستارى قىزا تۇسكەن. ەڭ باستىسى – ەگىستىكتەن الىنعان ءونىم دەر كەزىندە ءتيىمدى باعاعا ساۋدالانىپ، ديقاندار شىعىنعا ۇشىراماۋى ءتيىس. ول ءۇشىن اۋدان اكىمدىگى تاراپىنان بارلىق كومەكتەر كورسەتىلەتىن بولادى. بۇگىن بۇل تۋرالى بىرنەشە شارۋا قوجالىعىنداعى تەرىم جۇمىستارىنىڭ بارىسىمەن تانىسقان ماقتارال اۋدانىنىڭ اكىمى جامانتاي بەيسەنبايەۆ ءمالىم ەتتى.

اۋدان باسشىسى الدىمەن "تاحيرجان" شارۋا قوجالىعىنا بارىپ، باكلاجان ونىمدەرىن جيناۋ ناۋقانىنىڭ بارىسىمەن تانىستى. شارۋا قوجالىقتىڭ ءتوراعاسى ارىستان ساپاروۆ بيىل 1 گەكتارعا باكلاجان، 1 گەكتارعا جۇگەرى، 9 گەكتار جەرگە ماقتا ەگىپتى. بىلتىر 1 گەكتاردان 27 توننا باكلاجان ءونىمىن العان شارۋا بيىل دا بۇل داقىلدان جوعارى ءونىم الۋدى كوزدەپ وتىر. اتالعان قوجالىق باكلاجاننىڭ 1 كەلىسىن دەلدالدارعا 300 تەڭگەدەن ساتىپ جاتىر ەكەن.

«باكلاجان - كۇندەلىكتى تۇرمىسقا وتە قاجەتتى ونىمدەردىڭ ءبىرى. قۇرامىندا دارۋمەندەر وتە كوپ. مىنە، ەگىنشىلىكتى ءارتاراپتاندىرۋدىڭ ارقاسىندا ديقاندارىمىز بۇرىن سوڭدى ەكپەگەن كوكونىستىڭ وسىنداي تۇرلەرىنە بەت بۇرا باستادى. ديقاندارىمىز وسىلايشا وتاندىق نارىقپەن قاتار، رەسەيگە باكلاجان ونىمدەرىن ەكسپورتتاۋدا " - دەدى جامانتاي قاناي ۇلى.

مۇنان سوڭ اۋدان اكىمى "يسرايل" شارۋا قوجالىعىنىڭ جۇمىس بارىسىمەن تانىستى. قوجالىقتىڭ ءتوراعاسى التىنبەك تورايەۆ بيىل 0،5 گەكتار جەرگە بولگار بۇرىشىن ەگىپ، العاشقى ونىمدەرىن شىعارا باستاپتى. بولگار بۇرىشىنىڭ كەلىسىن 400 تەڭگەدەن ساتىپ جاتىر ەكەن. سونداي-اق، ول بيىل قيار مەن قىزاناق ەگىپ، جوعارى ءونىم الۋدا كوزدەپ وتىر.

ايتا كەتەيىك، بىلتىر ماقتارالدىق شارۋالار 3877 گەكتار جەرگە كوكونىس داقىلدارىن ەگىپ، 89689 توننا ءونىم العان بولاتىن. ال بيىلعى كورسەتكىش مۇنان دا جوعارى بولادى دەگەن سەنىم بار.