وڭتۇستىك قازاقستان وبلىسىندا باقشا ونىمدەرىن وندىرۋمەن تانىمال ماقتاارالدا قاۋىن-قاربىز ءپىستى. ەرتە پىسەتىن باقشا داقىلىنىڭ ءتۇرىن ەككەن شارۋالار بۇگىندە 55 توننا قاۋىن، 45 توننا قاربىز جيناپ، العاشقى ءونىمىن رەسەي مەملەكەتىنە جونەلتە باستادى.

ماقتارال اۋدانىندا باقشا ونىمدەرى بىلتىرعىعا قاراعاندا 10-15 كۇن ەرتە ءپىسىپ وتىر. بيىل اۋداندا جالپى 19 500 گەكتارعا  قاۋىن، 8 مىڭ گەكتاردان استام جەرگە قاربىز  ەگىلگەن.  ونىڭ ىشىندە ەرتە ەگىلگەن باقشا داقىلدارىنىڭ كولەمى 13200 گەكتاردى قۇرايدى.

قاربىزدان العاش بوپ ءونىم العان «ءابىش-اتا» شارۋا قوجالىعى 20 توننا ءونىمىن سىرتقى نارىققا شىعارىپ وتىر. قاربىزدىڭ كەلىسىن 140 تەڭگەدەن بوساتقان. اتالعان قوجالىق 3 گەكتار جەرگە ەگىلگەن قاربىزدىڭ گەكتارىنا 30 توننادان استام ءونىم الۋدى جوسپارلاپ وتىر.

ديقانشىنىڭ جۇمىسىنا ساتتىلىك تىلەي كەلگەن اۋدان اكىمى  جامانتاي بەيسەنبايەۆ «ءابىش-اتا» شارۋا قوجالىعىنان العاشقى ارتىلىپ جاتقان ءونىمنىڭ كۋاسى بولدى.

«ماقتارال اۋدانىنىڭ نەگىزگى كۇنكورىسى ەگىنشىلىك. سوندىقتان ماقتارالدىق ديقاندار كوكتەمنىڭ ءاربىر كۇنىن ءتيىمدى پايدالانۋدى ويلايدى. ەكى قاباتتى پلەنكاعا ەرتە پىسەتىن قاۋىن-قاربىز، باكلاجان، بالگارسكيي ەگەدى. بۇگىن مىنە، قاربىزدىڭ العاشقى ءونىمى رەسەيدىڭ ياكۋتيا اۆتونوميالىق رەسپۋبليكاسىنا ساتىلىمعا جونەلتىلدى. بيىل ماقتارالدىق شارۋالاردىڭ ءونىمى ءوتىمدى  ءارى ءونىمدى بولادى دەگەن سەنىم مول»، - دەدى اۋدان اكىمى.

ايتا كەتەيىك، بىلتىر وڭتۇستىك قازاقستان وبلىسىنىڭ ديقاندارى 1 ميلليون 300 مىڭ توننا باقشا ونىمدەرىن وندىرسە، سونىڭ 631 مىڭ تونناسى ماقتارالدىق ديقاندارعا تيەسىلى بولاتىن.