ماقتارال اۋدانىندا ىڭعايلاستىرىلعان ءبىلىم ۇيالارىنىڭ قاتارى جىلدان جىلعا ازايا ءتۇسۋى ءتيىس. ول ءۇشىن مەكتەپ قۇرىلىسىنا بولىنگەن رەسپۋبليكالىق جانە وبلىستىق بيۋدجەت قارجىلارىن ءتيىمدى پايدالانۋ قاجەت. سونداي-اق، ساپاسىنا اسا ءمان بەرىلىپ، قۇرىلىسقا باقىلاۋ كۇشەيەتىن بولادى. بۇل تۋرالى اسىقاتا كەنتىندەگى كۇردەلى جوندەۋدەن ءوتىپ جاتقان "جەڭىس" مەكتەپ گيمنازياسى مەن جىلىسۋ اۋىلدىق وكرۋگىندەگى جاڭادان قۇرىلىسى ءجۇرىپ جاتقان №114 مەكتەپتىڭ جاعدايىمەن تانىسقان اۋدان اكىمى ج.بەيسەنبايەۆ ءمالىم ەتتى.

اۋدان باسشىسى الدىمەن اسىقاتا كەنتىندەگى "جەڭىس" مەكتەپ گيمنازياسىنا اتباسىن بۇردى. ءبىلىم كورسەتكىشى بويىنشا اۋداندا ەكىنشى ورىننان تۇسپەيتىن ءبىلىم ۇياسىنىڭ عيماراتتارى ەسكىرگەن. 1972 جىلى 740 ورىندىق تيپتىك ۇلگىدە پايدالانۋعا بەرىلگەن مەكتەپتە بۇگىنگى تاڭدا 1159 وقۋشى 2 اۋىسىمدا ءبىلىم الۋدا.

2017 جىلى مەكتەپكە كۇردەلى جوندەۋ جۇمىستارىن جۇرگىزۋ ءۇشىن جوبالىق سمەتالىق قۇجات مەملەكەتتىك ساراپتامادان وتكىزىلىپ، قۇرىلىس-مونتاج جۇمىستارىنا 345 ميلليون 341 مىڭ تەڭگە قارجى قارالعان. جسق بويىنشا مەكتەپ 7 بلوكقا بولىنگەن. ءاربىر بلوگتار بويىنشا شاتىر، ەسىك، تەرەزە، ەدەن اۋىستىرۋ، ەلەكتر جەلىلەرى، بەتون توسەنىش، ىشكى جانە سىرتقى ارلەۋ جۇمىستارى، ورتكە قارسى دابىل قاققىش جۇيەلەرىن اۋىستىرۋ، سىرتقى قابىرعانى اسپولمەن قاپتاۋ جۇمىستارىن جۇرگىزۋ جوسپارلانعان.

"جەڭىس" مەكتەپ گيمنازياسىنىڭ ديرەكتورى اۋدان اكىمىنە مەكتەپتىڭ جىلىتۋ جۇيەلەرىن اۋىستىرۋ جانە ورتالىقتاندىرىلعان جىلىتۋ قازاندىعىن ورناتۋ جۇمىستارى جوبالىق سمەتالىق قۇجاتتا قارالماعانىن جەتكىزدى. ءوز كەزەگىندە اۋدان باسشىسى جامانتاي قاناي ۇلى ماسەلەنى شەشۋ ءۇشىن اۋداندىق ساۋلەت، قالا قۇرىلىسى جانە قۇرىلىس ءبولىمىنىڭ باسشىسى سانسىزباي سەيدالييەۆكە تاپسىرما بەردى.

"قۇرىلىس ساپالى بولۋ ءۇشىن ءبىز قاداعالاۋدى كۇشەيتۋىمىز كەرەك. اسىرەسە، ساپالى ماتەريالداردىڭ قولدانىلۋىن باستى نازاردا ۇستاۋدى كەنت اكىمى مەن قۇرىلىس ءبولىمىنىڭ باسشىسىنا تاپسىرامىن" - دەدى ج.بەيسەنبايەۆ.

مۇنان سوڭ ءوڭىر باسشىسى جىلىسۋ اۋىلدىق وكرۋگىنە قاراستى ءال-فارابي اۋىلىنداعى 200 ورىندىق №114 مەكتەپتىڭ قۇرىلىس بارىسىمەن تانىستى. 2017 جىلدىڭ جەلتوقسان ايىندا باستالعان نىسان قۇرىلىسىنا 608 ميلليون تەڭگەدەن اسا قارجى قارالعان. جاڭا عيمارات الداعى ءبىلىم كۇنىندە ەل يگىلىگىنە بەرىلەدى دەپ كۇتىلۋدە.