وڭتۇستىكتە 17-29 مامىر كۇندەرى اۋدان، قالالاردا باستاۋ العان «MEN QAZAQPYN» مەگا-جوباسىنىڭ وبلىستىق ىرىكتەۋ كەزەڭى اياقتالدى. ش.قالداياقوۆ اتىنداعى   فيلارمونيادا  وتكەن ءدۇبىرلى دودادا  ءار اۋداننان ۇزدىك شىققان 73 ونەرپاز قاتىستى. ولار تەرمە، كۇي، ءداستۇرلى ءان جانرى بويىنشا ونەرلەرىن ورتاعا  سالدى. 

قازىلار قۇرامىندا جازۋشى مارحابات بايعۇت، «Ońtústik» تەلەارناسىنىڭ ديرەكتورى   باۋىرجان   بەردىمۇراتوۆ،  كۇيشى-كومپوزيتور نۇرسات بەيسەقوجايەۆ، انشى-تەرمەشى جاقىپ سپاتايەۆ سىندى تانىمال ونەر تارلاندارى تورەلىك جاسادى. ءادىلقازى مۇشەلەرى ونەرپازداردىڭ كاسىبيلىگىنە، بىلىكتىلىگىنە، ءجۇرىس-تۇرىسى مەن كيىم ۇلگىسىنە دە اسا ءمان بەردى.

بايقاۋ قورىتىندىسى بويىنشا وڭتۇستىكتەن مىڭنان تۇلپار، جۇزدەن جۇيرىك بولىپ ءۇش ونەرپاز ىرىكتەلىپ، حالىقارالىق مەگا-جوبادا ءوڭىردىڭ نامىسىن قورعايتىن بولدى. ولاردىڭ قاتارىندا سوزاقتىق ءورازالى جاڭابايەۆ ءداستۇرلى ءان ونەرى بويىنشا وزگەلەردەن وزا شاپسا، تەرمە جانرى بويىنشا وتىرارلىق رۋسلان احيمبەكوۆتىڭ بابى مەن باعى قاتار شاپتى. ال ماقتارال اۋدانىنىڭ تۋماسى شىڭعىس يسايەۆ كۇي جانرى بويىنشا ونەرسۇيەر قاۋىمنىڭ قوشەمەتىنە بولەندى.

وبلىستان ىرىكتەلىپ شىققان ءۇش ونەرپاز الداعى ۋاقىتتا «QAZAQSTAN» تەلەارناسىنداعى «MEN QAZAQPYN» جوباسىندا 3 ميلليونعا جۋىق وڭتۇستىك ءوڭىرىنىڭ نامىسىن قورعايتىن بولادى.  رەسپۋبليكالىق اينالىمدا جەڭىسكە جەتكەن جەڭىمپازدار "جىلدىڭ ەڭ ۇزدىك ءداستۇرلى ءانشىسى"، "جىلدىڭ ەڭ ۇزدىك تەرمەشىسى" جانە "جىلدىڭ ەڭ ۇزدىك كۇيشىسى" اتالىمدارى بويىنشا ماراپاتتالادى.