وڭتۇستىك قازاقستان وبلىسىنىڭ اكىمى ج.تۇيمەبايەۆ جۇڭگو حالىق رەسپۋبليكاسى «شەنسي اۋىل شارۋاشىلىعى ەكونوميكالىق بىرلەستىگى» كومپانياسىنىڭ پرەزيدەنتى فانگ شي دجينگ باستاپ كەلگەن دەلەگاسياسىمەن كەزدەستى. باسقوسۋدا تاراپتار ەكى ەل اراسىنداعى ەكونوميكالىق بايلانىستى نىعايتۋ جانە وڭىرىمىزدە وندىرىلگەن اۋىل شارۋاشىلىق ونىمدەرىن قىتايعا ەكسپورتتاۋ ماسەلەسىن تالقىلادى.

ءوڭىر باسشىسى اۋىل شارۋاشىلىعى سالاسىنىڭ الەۋەتىمەن تانىستىرا كەلە، وبلىستىڭ دايىن ءونىمدى ەكسپورتتاۋعا دەگەن مۇمكىندىگى مول ەكەنىن ايتتى.

«ءبىزدىڭ وبلىس ەلىمىزدەگى ماقتا تالشىعى مەن ماقتا مايىن 100 پايىز، جەمىس، كوكونىس، ءجۇزىم، باقشا، ەت، قۇس ەتى، بالىق، ءسۇت ونىمدەرىن ءىرى كولەمدە وندىرەتىن جانە سول ونىمدەردى رەسپۋبليكا ايماعىنان سىرتقا ەكسپورتتاۋشى ايماق بولىپ تابىلادى. ءوڭىر حالقىنىڭ جەرگىلىكتى ازىق-تۇلىك ونىمدەرىمەن قامتاماسىز ەتۋ تەڭگەرىمىنە سايكەس، جەمىس-جيدەكپەن 1،2 ەسە، كوكونىسپەن 3،4 ەسەگە، باقشا ونىمدەرىمەن 4،6 ەسە، جۇزىممەن 5،9 ەسە قامتاماسىز ەتىلىپ، ارتىعى ەكسپورتقا شىعارىلادى. وبلىس ەكونوميكاسىنىڭ ءتۇرلى سالاسىنا ينۆەستيسيا تارتۋ وتە قولايلى، وعان مەملەكەت تاراپىنان قاجەتتى جاعدايلاردىڭ بارلىعى جاسالعان»، – دەدى جانسەيىت قانسەيىت ۇلى.

ءوز كەزەگىندە قوناقتار جىل وتكەن سايىن قىتايدا اۋىل شارۋاشىلىعى ونىمدەرىنە دەگەن سۇرانىس ارتىپ كەلە جاتقانىن جەتكىزدى. ماسەلەن، ءبىر عانا شەنسي وبلىسى بىلتىر 7 ملن. توننا اس مايىن، 8 ملن، توننا سيىر ەتىن، 5 ملن. توننا قوي ەتىن تۇتىنعان. قىتايلىقتار سۇرانىسقا بايلانىستى بۇل كورسەتكىشتى 10 پايىزعا دەيىن ارتتىرۋدى كوزدەيدى. سونداي-اق، دەلەگاتتار بۇگىنگى كۇنى ەلىمىزدە وندىرىلگەن ازىق-تۇلىكتىڭ 10-نان استام ءتۇرى جۇڭگو نارىعىنا شىعىپ جاتقانىن ايتا كەلە، تاعى قوسىمشا ۇن، ەت، ماي ونىمدەرىن الۋعا مۇددەلى ەكەنىن مالىمدەدى.

قوناقتاردىڭ ۇسىنىستارىن تىڭداپ شىققان وبلىس اكىمى سالا باسشىلارىنا كورشى ەلدىڭ ەكسپورتتىق سۇرانىسىن باعىتتالعان جۇمىستاردى جۇيەلەندىرۋدى تاپسىردى.