شىعىس قازاقستان وبلىسى اياگوز قالاسىنداعى 10810 اسكەري بولىمىندە مەرزىمدى اسكەري قىزمەت اتقارىپ جۇرگەن قوستانايلىق 21 جاستاعى ۆالەريي كرۋجنوۆ بەلگىسىز جاعدايدا قايتىس بولعان. بۇل تۋرالى ونىڭ تۋىسى الەكساندرا باداكيناعا سىلتەمە جاساپ "كوستانايسكيە نوۆوستي" باسىلىمى حابارلادى. ونىڭ ايتۋىنشا، ۆالەريي كرۋجنوۆتىڭ "ۇيىقتاپ جاتىپ قايتىس بولعانى" تۋرالى حاباردى ساربازدىڭ ۇي-ىشىنە ماۋسىمنىڭ 8ء-ى كۇنى ەستىرتكەن.

"ۇيىقتاپ جاتىپ قالاي قايتىس بولعانىن ۇقپاي وتىرمىز... كوپ سۇراققا ازىرشە جاۋاپ جوق"، - دەگەن باداكينانىڭ ءسوزىن كەلتىرگەن باسىلىم.

تۋىسىنىڭ سوزىنشە، وتباسىنداعى جالعىز بالا بولىپ ەر جەتكەن ۆالەريي كرۋجنوۆتى اسكەري قىزمەتكە شاقىرتقان كەزدە دارىگەرلەر ونىڭ جۇرەگىندە سىرقات بارىن انىقتاعان. "ودان ارمياعا بارعىڭ كەلە مە دەپ سۇراعاندا ۆالەرا: "ەگەر قاجەت بولسا - بارامىن" دەپ جاۋاپ بەرگەن"، - دەيدى الەكساندرا باداكينا.

مامىردىڭ 1ء-ى كۇنى قازاقستان قارۋلى كۇشتەرى قاتارىنا مىندەتتى اسكەري بورىشىن وتەۋگە قوستاناي وبلىسىنان شاقىرتىلعان ۆالەريي كرۋجنوۆ بىرنەشە اپتادان سوڭ اسكەري انت قابىلداعان. ول اياگوزدەگى "شىعىس" ايماقتىق اسكەري باسشىلىعىنا قاراستى 10810 اسكەري بولىمىندە قىزمەت اتقارعان.