الماتىدا توتال ەنەردجي جازعى مەكتەبى ءوتىپ جاتىر. مەكتەپ ءال-فارابي اتىنداعى قازاق ۇلتتىق ۋنيۆەرسيتەتىندەگى «گەو-ەنەرگەتيكا» عىلىمي زەرتتەۋ ورتالىعىنىڭ بازاسىندا ۇيىمداستىرىلعان.

جازعى مەكتەپتىڭ باستى مىندەتى – ستۋدەنتتەردىڭ تەوريالىق بىلىمدەرى مەن پراكتيكالىق داعدىلارىن نىعايتىپ، سونداي-اق، قازاقستان مەن فرانسيا اراسىنداعى ءبىلىم بەرۋ سالاسىنداعى حالىقارالىق ىنتىماقتاستىقتى دامىتۋ. دارىستەردى توتال كومپانياسىنىڭ ساراپشىلارى كاسىبي ساراپتاما جۇرگىزۋ جانە پراكتيكادان الىنعان ناقتى مىسالداردى زەرتتەۋ نەگىزىندە دايىندادى.

 «تولىعىمەن «توتال» كومپانياسىنىڭ باستاماسى بولىپ تابىلاتىن بۇل جازعى مەكتەپ العاش رەت وتكىزىلىپ وتىر. «توتال» - جاس تالانتتاردى قولداۋ جانە جەرگىلىكتى كادرلاردى دامىتۋ جونىندە مىندەتتەمەسى بار قازاقستاندا 25 جىل بويى قىزمەت ەتىپ كەلە جاتقان جاۋاپكەرشىلىگى جوعارى مۇناي-گاز كومپانياسى، - دەپ اتاپ ءوتتى قازاقستانداعى توتال كونسەرنىنىڭ باسشىسى پاسكال برەان. – سوندىقتان دا ىنتىماقتاستىعىمىزدى ەڭ بەدەلدى جوعارعى وقۋ ورىندارىنىڭ ءبىرى – قازۇۋ-دەگى «گەو-ەنەرگەتيكا» ورتالىعىمەن باستاۋدى ءجون كوردىك. جازعى مەكتەپ جىل سايىن ۇيىمداستىرىلاتىن جوباعا اينالادى دەپ جوسپارلاپ وتىرمىز، سونداي-اق، ونى الماتىدا عانا ەمەس، سونىمەن بىرگە، بۇكىل قازاقستاننىڭ ستۋدەنتتەرى وعان قاتىسا الۋى ءۇشىن استانادا جانە باسقا دا قالالاردا وتكىزگىمىز كەلەدى».

ءقازىردىڭ وزىندە مەكتەپتە قازۇۋ ستۋدەنتتەرى عانا ەمەس، سونىمەن بىرگە، پوليتەحنيكالىق ۋنيۆەرسيتەتتىڭ، زاڭ ۋنيۆەرسيتەتىنىڭ، كاسپيي ۋنيۆەرسيتەتىنىڭ، قبتۋ ستۋدەنتتەرى وقىپ جاتىر. جازعى مەكتەپتىڭ باعدارلاماسى مۇناي كەنورىندارىن يگەرۋ جانە پايدالانۋ، مۇنايدى تاسىمالداۋىمەن بايلانىستى ماسەلەلەردى عانا ەمەس، سونىمەن بىرگە، حالىقارالىق قۇقىقتىڭ تولىقتىرمالىلىعى، مەنەدجمەنت، حالىقارالىق قاتىناستار سىندى ەلدىڭ دامۋىنا جاردەمدەسىپ، شەتەلدىك كومپانيالارعا قازاقستاندا جۇمىس جاساۋعا مۇمكىندىك بەرەتىن گۋمانيتارلىق ماسەلەلەردى قامتيتىنداي ەتىپ دايىندالعان.

11-15 ماۋسىم كۇندەرى ارالىعىندا ءوتىپ جاتقان توتال ەنەردجي جازعى مەكتەبى ەنەرگەتيكا سالاسىنداعى پاندەردى وقيتىن باكالاۆرلار-ستۋدەنتتەرگە جانە ماگيسترانتتارعا ارنالعان.