بۇگىن شىمكەنت قالاسىندا «استانانىڭ 20 جىلدىعىنا - 20 نىسان» اكسياسى اياسىندا «استانا» شاعىن اۋدانى مەن «استانا» گۇلزارى اشىلدى. سونىمەن قاتار، وبلىستىق اكىمشىلىك-ىسكەرلىك ورتالىعى اۋماعىندا ورنالاسقان وسى شاعىناۋداننان تۇرعىندارعا جاڭا پاتەرلەردىڭ كىلتى تاپسىرىلدى.سالتاناتتى شاراعا قاتىسقان وبلىس اكىمى جانسەيىت تۇيمەبايەۆ پەن قالا اكىمى نۇرلان ساۋرانبايەۆ كوپشىلىكتى وسى قۋانىشتى ساتپەن قۇتتىقتادى.

- شىمكەنت – ەلىمىزدە استانا مەن الماتى قالالارىنان كەيىنگى ەڭ ءىرى شاھار. بۇگىن قالانى  ودان ءارى جاسىلداندىرىپ، كوركىنارتتىرۋ ماقساتىندا«استانا»  حالىقتىڭ يگىلىگىنە پايدالانۋعا بەرىلىپ وتىر. وزدەرىڭىز تاماشالاپ وتىرعان گۇلزاردىڭ ورتالىق الاڭىندا ورنالاسقان شاڭىراق بەينەسى حالقىمىزدىڭ ۇلتتىق بىرلىگى مەن تاتۋلىعىن مەڭزەپ تۇرعانداي. سونداي-اق، بۇگىن استانانىڭ 20 جىلدىق مەرەكەسى قارساڭىندا قالا تۇرعىندارىنا جاڭا پاتەر كىلتىن تاپسىرعالى تۇرمىز. بۇل جەتىستىكتەردىڭ بارلىعىنا تاۋەلسىزدىگىمىزدىڭ جانە ەلباسىمىزدىڭ ارقاسىندا قول جەتكىزىپ وتىرمىز. بارشاڭىزعا ساتتىلىك، شاڭىراقتارىڭىزعا قۇت-بەرەكە تىلەيمىن. قونىستارىڭىز قۇتتى بولسىن! - دەدى جانسەيىت قانسەيىت ۇلى.

«نۇرلى جەر» باعدارلاماسى بويىنشا سالىنعان بۇل ءۇيدىڭ پاتەرلەرى الەۋمەتتىك از قامتىلعان وتباسىلار مەن جەتىمدەرگە جانە ۇزاق ۋاقىتتان بەرى تۇرعىن ءۇي كەزەگىندە تۇرعان ازاماتتارعا بەرىلدى. جالپى، اكىمشىلىك-ىسكەرلىك ورتالىعىندا وسى ۋاقىتقا دەيىن 90 مىڭ شارشى مەتر تۇرعىن ءۇي پايدالانۋعا بەرىلگەن. قازىرگى تاڭدا مۇندا كوپقاباتتى 27 تۇرعىن ءۇيدىڭ قۇرىلىسى جۇرگىزىلىپ جاتىر. ەندى بۇل مولتەكاۋدان «استانا» دەپ اتالاتىن بولدى.

ال، اۋماعى 1 گەكتارعا جۋىق گۇلزاردا شىنار، كاشتان، قايىڭ اعاشتارى مەن ءتۇرلى گۇلدەر وتىرعىزىلىپ، ورىندىقتار مەن جارىقشامدار، بالالارعا ارنالعان ويىن الاڭشالارى ورناتىلعان. الداعى ۋاقىتتا دا قالانى اباتتاندىرۋ باعىتىندا جۇمىستار جالعاسىن تابادى.