باتىس قازاقستان وبلىسىندا «مەرەيلى وتباسى-2018» ۇلتتىق بايقاۋىنىڭ ايماقتىق كەزەڭى قورىتىندىلاندى. بايقاۋ ءداستۇرلى تۇردە جىل سايىن ءوتىپ كەلەدى. سالتاناتتى شاراعا ارنايى كەلگەن وبلىس اكىمىنىڭ ورىنباسارى عابيدوللا وسپانقۇلوۆ وتباسىلىق قۇندىلىقتاردى دارىپتەيتىن بايقاۋدىڭ ماڭىزدىلىعىن اتاپ ءوتتى.

- وتباسى-شاعىن مەملەكەت. كەز كەلگەن قوعامنىڭ ىرگەتاسى-وتباسى ەكەندىگى بەلگىلى. سوندىقتان وتباسىلىق قۇندىلىقتاردى جاستاردىڭ ساناسىنا ءسىڭىرۋ مەملەكەتتىك ساياساتتىڭ باستى باعىتتارىنىڭ ءبىرى. ەلباسىمىز «رۋحاني جاڭعىرۋ» باعدارلاماسىندا ءسالت-داستۇرىمىزدى جاڭعىرتۋ قاجەتتىگىنە ايرىقشا كوڭىل بولگەن. ال قازاق حالقىنىڭ وتباسى دىڭگەگى اركەز مىقتى بولعان. سوندىقتان ەل ىشىندەگى ۇلگىلى، ونەگەلى وتباسىلاردى وزگەلەرگە ۇلگى ەتىپ ءناسيحاتتاۋ-بىزدىڭ باستى مىندەتتەرىمىزدىڭ ءبىرى، - دەپ ءسوزىن ساباقتاعان  عابيدوللا ابدوللا ۇلى  بايقاۋ جەڭىمپازدارىنا ديپلومدار مەن سىيلىقتار تابىستادى.

وبلىستىق بايقاۋدىڭ قورتىندىسى بويىنشا ءۇشىنشى ورىن جانىبەكتىك بيسەنعالييەۆتەر، ەكىنشى ورىن زەلەنوۆتىق يماشيەۆتار، ءبىرىنشى ورىن قازتالوۆتىق ەرەكەشوۆتەر  وتباسىنا بۇيىرسا، باس جۇلدەنى ورالدىق الماعامبەتوۆتار وتباسى يەلەندى. جەڭىمپاز وتباسى قىركۇيەك ايىندا ەلوردامىز استانا قالاسىندا وتەتىن بايقاۋدىڭ گراند-بالىنا قاتىسادى.

«اق وتاۋ» قوعامدىق بىرلەستىگىنىڭ ءتورايىمى التىناي ەسقالييەۆانىڭ ايتۋىنشا، بايقاۋدىڭ وبلىستىق كەزەڭىنە 26  وتباسى  قاتىستى.

-جەڭىمپاز، جۇلدەلى ورىندارعا قوسا، ءار وتباسىعا ءتۇرلى اتالىمدار مەن باعالى سىيلىقتار بەرىلدى.  جىل سايىن بايقاۋعا قاتىسۋعا نيەت بىلدىرۋشىلەردىڭ قاتارى  كوبەيىپ  كەلەدى. بۇل جولى بايقاۋدىڭ باس جۇلدەسىن جەڭىپ العان  ورالدىق الماعامبەتوۆتەر وتباسى  بىر-بىرىنە دەگەن ەرەكشە قۇرمەتىمەن، تولەرانتتىلىعى، ەڭبەكسۇيگىشتىگى، ءۇش ءتىل بىلەتىندىگىمەن ەرەكشەلەنەدى، -دەيدى ول.

سالتاناتتى شارادا بايقاۋعا قاتىسۋشى بارلىق وتباسىلار ءتۇرلى اتالىمدارمەن ماراپاتتالدى. ولاردىڭ قاتارىندا «ەلىنە ەڭبەگى سىڭگەن» اتالىمىمەن قاراتوبەلىك قازييەۆتەر وتباسى، «جاس ۇرپاققا ۇلگى ەتەر وتباسى» اتالىمىمەن زەلەنوۆتىق تابىلدييەۆتەر وتباسى، «ونەرلى وتباسى» اتالىمىمەن ماراپاتتالعان  اقجايىقتىق بەيلوۆتەر وتباسى بار.

گۇلجامال جولدىعالي،

«ورال ءوڭىرى»