تىرىدەي جانىپ كەتە جازداعان جەتكىنشەكتىڭ اناسى ونىڭ ۇستىنە كورشى ءۇيدىڭ بالالارى ادەيى وت قويعان دەپ ەسەپتەيدى. سوندىقتان بۇزاقىلار مەن ولاردىڭ اتا-اناسىن قاتاڭ جاۋاپقا تارتقىزۋدى تالاپ ەتىپ وتىر، دەپ حابارلايدى Qamshy.kz اقپارات اگەنتتىگى sputniknews.kz-كە سىلتەمە جاساپ. 

بۇدان بۇرىن حابارلانعانداي، تارازدا 6 جاستاعى بالا كوشەدە ءجۇرىپ وتقا ورانعان. ونى تۋعان اعاسى دەر كەزىندە بايقاماعاندا تىرىدەي جانىپ كەتۋى مۇمكىن ەدى. جان ۇشىرا ايعايلاعان باۋىرىنىڭ داۋىسىن ەستىگەن ول دەرەۋ جەتىپ ارقاسىنداعى لاپىلداعان وتتى سوندىرگەن. زارداپ شەگۋشىنىڭ اناسى بۇل جاعدايعا كورشى ءۇيدىڭ 7 جاستاعى ەگىزدەرىن ايىپتايدى.

"ەسىن جيعاننان كەيىن ۇلىمنىڭ ءوزى ايتتى. روما دەگەنى ماكسيمنىڭ ۇستىنە بەنزين شاشىپ جىبەرگەن. ارتىنشا دانيل سىرىڭكەنى تۇتاتىپ لاقتىرعان. قويىڭدارشى دەپ جالىنعان، ءبىراق ولار دەگەندەرىن ىستەگەن"، — دەيدى ماكسيمنىڭ اناسى ۆەرا لەگوستايەۆا.

ۆەرا لەگوستايەۆانىڭ ايتۋىنشا، كورشىسى جانارماي بەكەتىندە وپەراتور بولىپ ىستەيدى ەكەن. بالالار بەنزيندى ۇيدەن الىپ شىققان كورىنەدى. ونىڭ ۇستىنە، ولاردىڭ بۇزاقىلىقپەن كوزگە ءتۇسۋى ءبىرىنشى رەت ەمەس دەپ وتىر.

"مەنىڭشە، بۇل بالالاردى اتا-اناسىنان اجىراتىپ، ارنايى ءتارتىبى ناشار بالالار وقيتىن مەكتەپكە بەرىپ، اكە-شەشەسىن دە قاتاڭ جازالاۋ كەرەك. مۇنداي جاعداي شەتەلدە بولسا، ءدال وسىلاي جاسار ەدى"، — دەيدى اشىنعان انا.

ال ەگىزدەدىڭ اناسى ناتاليا تەنتەكتەرىن اقتاپ الەككە ءتۇستى. ونىڭ سوزىنە سۇيەنسەك، ماكسيم بايقاۋسىزدا ءوزىن-وزى ورتەپ العان. 

"مۇنى قانىشەرلىك، ادەيى ىستەدى دەپ ايتۋعا كەلمەيدى. ولار ويناپ ءجۇرىپ، ىشىندە سۇيىقتىعى بار قۇتى  تاۋىپ العان. ىشىندەگىسىن ەكىنشى ىدىسقا  قۇيىپ ساپىرعان. وسى ساتتە ءورت شىققان بولۋى مۇمكىن"، — دەيدى ول.

دەنەسىنىڭ 18 پايىزى كۇيىپ قالعان ماكسيم ءۇش كۇن جانساقتاۋ بولىمىندە جاتىپ، جالپى پالاتاعا بۇگىن شىقتى. 

"بالانىڭ قازىرگى ءحالى تۇراقتى اۋىر دەپ باعالايمىز. ءبىر اپتادان كەيىن ەكىنشى كەزەڭدەگى وپەراسياعا دايىنداپ جاتىرمىز. ول وپەراسيا دەنەدەگى كۇيگەن تەرىلەردى تازالاپ الۋ ءۇشىن قاجەت. سودان كەيىن ءۇشىنشى كەزەڭدە ول جەرگە باسقا تەرى جابىستىرامىز"، – دەپ مالىمەت بەردى تاراز قالالىق №2 اۋرۋحاناسى كۇيىك ءبولىمىنىڭ مەڭگەرۋشىسى ابىلسەيىت سىدىقوۆ.

ماكسيمنىڭ اناسى قانشا تىرىسسا دا، بالاسىنا ءجابىر كورسەتكەندەر جازاسىز قالاتىن سياقتى. سەبەبى  كىنالى ەكەنى دالەلدەن جاعدايدا جاس ەرەكشەلىگىنە بايلانىستى جاۋاپقا تارتىلمايدى. دەگەنمەن ءىستىڭ انىق-قانىعىن ءبىلۋ ماقساتىندا تەرگەۋ جۇمىستارى جۇرگىزىلىپ جاتىر.