الماتىدا ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردىڭ سىرتقى ىستەر مينيسترلەرى باس قوسىپ جاتىر.

سىرتقى ىستەر مينيسترلەر كەڭەسىنىڭ كەزەكتى وتىرىسى ق ر ءسىم باسشىسى قايرات ءابدىراحمانوۆتىڭ توراعالىعىمەن اشىلدى.

ق ر ءسىم باسشىسى  رف سىرتقى ىستەر ءمينيسترى سەرگەي لاۆروۆتى رەسەي كۇنىمەن، فۋتبولدان الەم چەمپيوناتىنىڭ اشىلۋىمەن قۇتتىقتادى.

سونىمەن قاتار، قايرات ءابدىراحمانوۆ ارميان وكىلى زوگراب مناساكانياندى جاڭا قىزمەتىمەن قۇتتىقتادى.

«سىزدەر قاۋىرت شارۋالارىڭىزعا قاراماستان الماتىداعى شاراعا كەلىپ قاتىسىپ جاتقاندارىڭىزعا العىس بىلدىرەمىن. جۇمىستارىڭىزعا ساتتىلىك تىلەيمىن»، - دەدى قايرات ءابدىراحمانوۆ.

باسقوسۋ كۇنتىزبەسىندە 12 ماسەلە قاراستىرىلادى.

مينيسترلەر ۇيىم جانىنداعى سىرتقى ساياسات ماسەلەلەرى بويىنشا ۇيلەستىرۋدى، سونداي-اق حالىقارالىق جانە ايماقتىق قاۋىپسىزدىكتىڭ وزەكتى ماسەلەلەرىن تالقىلاماق. كەزدەسۋ بارىسىندا دەلەگاتتار ترانسشەكارالىق سىن-قاتەرلەر، ءبىرىنشى كەزەكتە تەرروريستىك ۇيىمدار تاراپىنان بولاتىن قاۋىپ-قاتەرلەرگە قارسىلىق كورسەتۋ بويىنشا تاجىريبە الماستى.

سونىمەن قاتار، مينيسترلەر ۇجىمدىق قاۋىپسىزدىك تۋرالى شارت ۇيىمىنىڭ ارنايى جول كارتاسىندا بەلگىلەنگەن «بۇۇ حالىقارالىق بەيبىتشىلىك قىزمەتىن دامىتۋ مۇددەسىندە (2018-2021 جىلدارعا ارنالعان) ۇقشۇ بەيبىتشىلىك تۋدىرۋ الەۋەتىن پايدالانۋعا جاعداي جاساۋ» تاقىرىبىن تالقىلايدى.

سونداي-اق، «ۇقشۇ مەن حالىقارالىق قىزىل كرەست پەن جارتى اي كوميتەتى مەن ۇقشۇ اراسىنداعى حاتتاما»، «ۇقشۇ مۇشە ەلدەرى مۇددەلەرىنە سايكەس ۇيلەستىرىلگەن اقپاراتتىق ساياساتتى دامىتۋ بويىنشا شارالار جوسپارى»، ۇقشۇ مۇشە ەلدەرىنىڭ زاڭسىز كوشى-قون سالاسىنداعى ىنتىماقتاستىق تۋرالى كەلىسىمدى قاراستىردى.