تىلدىك قولدانىسىمىزعا «سيفرلاندىرۋ» ءسوزىنىڭ ەنگەنىنە كوپ بولا قويعان جوق. الايدا ساندىق تەحنولوگياعا كوشۋ قاي سالانى بولسا دا جانداندىرعانى انىق. وسى ورايدا ورال گاز، مۇناي جانە سالالىق تەحنولوگيالار كوللەدجىندە  «سيفرلى وقۋ ورنى» اتتى وبلىستىق يننوۆاسيالىق جوبالار بايقاۋى ءوتتى. تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى اراسىندا وتكەن بايقاۋعا 14 كوللەدجدەن 27 ستۋدەنت قاتىسىپ، ءوز جوبالارىن ۇسىندى. وبلىستىق ءبىلىم باسقارماسىنىڭ وقۋ-ادىستەمەلىك كابينەتىنىڭ ءبولىم باسشىسى رايگۇل قۋانشالييەۆا مۇنداي بايقاۋ بقو-دا ءبىرىنشى رەت ۇيىمداستىرىلعاندىعىن ايتادى.

– بايقاۋدىڭ ماقساتى – ستۋدەنتتەردىڭ يننوۆاسياعا دەگەن قىزىعۋشىلىعىن ارتتىرۋ. ولاردىڭ سيفرلىق ساۋاتتىلىقتارىن دامىتىپ، ۇزدىك يننوۆاسيالىق جوبالاردى انىقتاۋ، كرەاتيۆتى ىزدەنىستى ىنتالاندىرۋ بولىپ تابىلادى. ەلباسىمىز بيىلعى جولداۋىنىڭ «ادامي كاپيتال – جاڭعىرۋ نەگىزى» باعىتىندا «جۇمىس بەرۋشىلەردى تارتۋ ارقىلى جانە حالىقارالىق تالاپتارمەن سيفرلىق داعدىلاردى ەسكەرە وتىرىپ، تەحنيكالىق جانە كاسىپتىك ءبىلىم بەرۋ ۇيىمدارىنداعى باعدارلامالاردى جاڭارتۋ كەرەكپىز» دەپ اتاپ وتكەن بولاتىن. بۇگىنگى بايقاۋدى وسى ماقساتتا وتكىزدىك، ەندى بۇل بايقاۋدى بەس جىل قاتارىنان وتكىزبەكپىز، – دەيدى رايگۇل تىلەكقابىل قىزى. 

قاتىسۋشى ستۋدەنتتەر ءوز جوباسىن تورەشىلەر الدىندا ەكى سەكسياعا ءبولىپ قورعادى. ءادىلقازى القاسىنىڭ شەشىمىمەن باس جۇلدە ءبىرىنشى سەكسيادا «دامىتۋ ويىندارىنىڭ ۇزدىك جوباسى» باعىتى بويىنشا «لاتىنقاز» ويىنى تاقىرىبىنداعى جوباسى ءۇشىن ورال قالاسىنداعى ج. دوسمۇحامەدوۆ اتىنداعى پەداگوگيكالىق كوللەدجىنىڭ ستۋدەنتى انداس قاجىموۆقا، ەكىنشى سەكسيادا ەلەكتروندى-سيفرلىق رەسۋرس ازىرلەۋ سالاسىنداعى ۇزدىك جوبا (ەلەكتروندى وقۋلىقتار، ەلەكتروندى وقۋ قۇرالدارى) باعىتى بويىنشا «لاتىن ءالىپبيى» ەلەكتروندىق وقۋ قۇرالى تاقىرىبىنداعى جوباسى ءۇشىن تاعى دا اتالمىش كوللەدجدىڭ ستۋدەنتى اسىلحان ءاجىمۇراتقا بەرىلدى. ءساتتى شىققان وزگە دە جوبالارعا جۇلدەلى ورىندار بەرىلىپ، العىسحاتتارمەن ماراپاتتالدى.