اعىمداعى القابيلەردىڭ قاتىسۋىمەن 3 قىلمىستىق ءىس قارالعان.
بۇل اقپاراتتى الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءتوراعاسى مارتبەك كاكىمجانوۆ ايتتى.
مارتبەك كاكىمجانوۆ ايتۋىنشا، مەملەكەتتىڭ ناشاقورلىققا قارسى ساياساتىن جۇزەگە اسىرۋ ءۇشىن مەملەكەتتىك ورگاندار مەن قوعام بىرلەسىپ، ناركومانيا پروبلەماسىن جويۋدا كۇش جىگەرىن سالۋ كەرەك.
الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىندا 2015 جىلى – 3 قىلمىستىق ءىس، 2016 جىلى – 5 قىلمىستىق ءىس، 2017 جىلى – 4 قىلمىستىق ءىس جانە 2018 جىلدىڭ 6 ايىنىڭ قورىتىندىسى بويىنشا – 3 قىلمىستىق ءىس القابيلەردىڭ قاتىسۋىمەن قارالدى.
القابيلەرگە ۇمىتكەرلەردى جيناۋ بارىسىندا نەگىزگى پروبلەما، ازاماتتاردىڭ ءوزىنىڭ القابي رەتىندەگى ازاماتتىق بورىشىن ورىنداماۋى جانە سوتقا كەلمەۋلەرى. القابيلەر ينستيتۋتىن ءتۇسىندىرۋ جانە مامانداندىرىلعان سوتتىڭ جۇمىسىن كورسەتۋ ماقساتىندا، سوت قىزمەتكەرلەرىمەن تۇراقتى تۇردە اشىق ەسىك كۇدەرى وتكىزىلەدى، شارا بارىسىندا كەز كەلگەن قىزىعۋشىلىق تانىتقان ازامات، سوت جۇمىسىمەن جانە سوتتا قارالىپ جاتقان ىستەر بويىنشا سۇراقتارعا جاۋاپ الا الادى. سونىمەن قاتار باسپا ءسوز قىزمەتكەرلەرىمەن قوعامدا قىزىعۋشىلىق تانىتقان، قارالىپ بىتكەن قىلمىستىق ىستەر بويىنشا پرەسس رەليزدەر جاريالانادى، - دەپ ءسوزىن قورىتىندىلادى مارتبەك ءاشىم ۇلى.
ءتوراعانىڭ اقپاراتىنشا، الماتى قالاسىندا 2010 جىلدان بەرى قىلمىستىق ىستەر جونىندەگى مامانداندىرىلعان اۋدانارالىق سوتى جۇمىس اتقارۋدا، مەگاپوليستىڭ اۋماعىندا جاسالعان اسا اۋىر ساناتتاعى قىلمىستىق ىستەردىڭ بارلىعى قارالادى. مامانداندىرىلعان سوت قىزمەتىندە ونى جالپى يۋرديكسيالى سوتتاردان ايىراتىن ەكى ەرەكشەلىگى بار. ءبىرىنشى ەرەكشەلىگى – قىلمىستىق ىستەردەگى اسا اۋىر ساناتتاعى قىلمىستاردىڭ قارالۋى، ياعني، جاساعان قىلمىسى ءۇشىن قىلمىستىق جازا 12 جىلدان استام مەرزىمگە باس بوستاندىعىنان ايىرۋ نە ءومىر بويى باس بوستاندىعىنان ايىرۋ نەمەسە ءولىم جازاسى قولدانىلادى. زاڭ شىعارۋشى اسا اۋىر قىلمىستار جاساعانى ءۇشىن مۇنداي قاتاڭ جازانى كەزدەيسوق بەرمەيدى، ادەتتە ولار قوعامعا قاۋىپتىلىگى جوعارى جانە حالىق اراسىندا قىزىعۋشىلىق تۋدىرعان ىستەر.
2018 جىلدىڭ 6 ايىنىڭ قورىتىندىسى بويىنشا بارلىعى 59 ءىس قارالعان، ونىڭ ىشىندە قاساقانا ادام ءولتىرۋ بويىنشا قارالعان 26 ءىس، بارلىق قارالعان ءىستىڭ 44 پايىزىن قۇرايدى. كوبىنەسە ادام ءولتىرۋ تۇرمىستىق، الكوگولدى ىشىمدىكتەن ماس كۇيدە جاسالادى.
سونىمەن قاتار، ەسىرتكى زاتتارىنىڭ اسا ءىرى مولشەردەگى زاڭسىز اينالىمى بويىنشا ىستەر بارلىق ىستەردىڭ ايتارلىقتاي ۇلەسىن قۇرايدى.
قازىرگى تاڭدا ەسىرتكىلەردىڭ زاڭسىز اينالىمىمەن كۇرەس قازاقستان رەسپۋبليكاسىنىڭ مەملەكەتتىك ساياساتىنىڭ ماڭىزدى قۇرامداس بولىگى بولىپ تابىلادى. مەملەكەت 2017-2022 جىلدارعا ارنالعان شانحاي ىنتىماستىق ۇيىمىنا مۇشە مەملەكەتتەردىڭ ەسىرتكىگە قارسى ستراتەگياسىن قوسا العاندا، ەسىرتكىگە قارسى كۇرەس سالاسىنداعى حالىقارالىق جەلىلەر مەن باعدارلامالاردى قۇرۋ مەن قولداۋدا بەلسەندى قاتىسادى،- دەپ سوت ءتوراعاسى كاكىمجانوۆ مارتپەك ءسوزىن اياقتادى.
