الماتى قالاسى س.بەگالين اتىنداعى مەملەكەتتىك بالالار كىتاپحاناسىندا استانانىڭ 20 جىلدىعىنا وراي اقىن، دراماتۋرگ، مەملەكەت جانە قوعام قايراتكەرى نۇرلان ورازالينمەن كەزدەسۋ ءوتتى. كەزدەسۋدى الماتى قالاسى ىشكى ساياسات باسقارماسىنىڭ تاپسىرىسىمەن «ەل-شەجىرە» قوعامدىق قورى ۇيىمداستىردى.
جيىننىڭ باستى ماقساتى – ەلوردانىڭ ەلىمىزدىڭ دامۋىنا قوسقان ۇلەسى مەن اتقارىلعان ۇلى ىستەرىن جاستارعا جەتكىزۋ. سونداي-اق، جاس قالانىڭ ۇلتتىق سيپاتىمىزعا اينالىپ، بەرىكتىگىمىزدى ساقتاي العانىن تولىعىراق ءتۇسىندىرۋ.
الەمدەگى ەڭ جاس استاناعا – 20 جىل. وسى ۋاقىت ارالىعىندا جاڭا قالا جاسامپاز ەلورداعا اينالدى. ارقا توسىندە ءسانى مەن سالتاناتى جاراسىپ، وزىق يدەيالاردى، جاڭا عىلىمي شەشىمدەر مەن ساۋلەت ونەرىنىڭ وزىق ۇلگىلەرىن ومىرگە اكەلدى. تولعاقتى تۇيىندەردى تالقىلايتىن جاھاندىق ورتالىق بولدى. وسى ورايدا نۇرلان ورازالين اڭگىمەسىن ارىدان باستاپ، الاتاۋدان ارقاعا قالاي كوشىرىلگەنى جايىندا باياندادى. بۇعان قوسا، استانانىڭ بۇگىنگە دەيىنگى داڭعىل ءارى دارا جولىن تۇشىمدى ويلارىمەن ورتاعا سالدى.
«استانانى كوشىرۋ ايتار اۋىزعا وڭاي بولعانىمەن، ول زاماندا كوپ قيىندىق تۋدىردى. ءبىر ۇرەي، ءبىر قورقىنىشپەن ۇلكەن جاۋاپكەرشىلىكتىڭ جۇگى ارتىلدى. 1993 جىلى «ەگەمەن قازاقستان» گازەتىنە باس رەداكتور قىزمەتىنە ورنالاستىم. ەلباسىمەن بولعان العاشقى سۇحباتىمدا وسىعان قاتىستى سۇراق قويعانمىن. سوندا ول كىسى «ءبىز مەملەكەتتىك تۇتاستىعىمىزدى ساقتاۋ ءۇشىن، الماتى سەكىلدى ارداقتى، اياۋلى قالانىڭ مارتەبەسىن بەكىتە وتىرىپ، استانانى سولتۇستىككە كوشىرۋگە ءتيىسپىز. ويتكەنى تاۋەلسىزدىگىمىزدى العانىمىزبەن، ءالى تەكتىلىگىمىز بويىمىزعا تولىق سىڭە قويعان جوق، سوندىقتان ارقاعا كوشتى تۇزەۋىمىز كەرەك»، – دەپ جاۋاپ بەرگەن بولاتىن. دەسە دە بۇل شەشىمگە قارسىلىق تانىتقاندار دا بولدى. ءبىراق ىشكى ميگراسيانى، ساياسي سيپاتى بار استانانى قالىپتاستىرۋدى بارلىعى قالادى. ەگەمەندى ەل اتانۋ – قازاقتىڭ ماڭدايىنا بىتكەن باعى. تۇتاستىعىمىزدى ساقتاپ كەلە جاتقان ءبىرتۇتاس ۇلتپىز. وسى جىلدار ىشىندە تاۋەلسىزدىكتىڭ تىزگىنىن ۇستاي الاتىن قابىلەتىمىزدىڭ بار ەكەنىن دالەلدەدىك»، – دەدى ن.ورازالين.
كەزدەسۋگە جينالعان قوناقتار اقىنعا ارنايى سۇراقتارىن قويىپ، ولەڭدەرىنەن وقىپ بەرۋىن ءوتىندى. وسىلايشا استانانىڭ تورقالى تويىنا ارنالعان كەزدەسۋدە كەزەكتى ولەڭدەرىن وقىپ، كەشتى قورىتىندىلادى.
