تۇركىستان وبلىسىنىڭ ورتالىعىندا ق.ا.ياساۋي كەسەنەسىنىڭ الدىندا «ۇلتتىق دومبىرا كۇنى» مەرەكەسىندە 1000 دومبىراشى قۇرمانعازىنىڭ «سارىارقا»، «بالبىراۋىن»، تۇركەشتىڭ «كوڭىلاشار» كۇيلەرىن ورىندادى. بۇدان بولەك، بارلىق اۋدان، قالالاردا ءبىر مەزگىلدە دومبىراشىلاردىڭ فلەشموبى ۇيىمداستىرىلدى. وسىلايشا جالپى سانى 3 مىڭنان استام دومبىراشى ۇلتتىق ونەردى دارىپتەدى.

بيىلعى جىلى ەلباسى نۇرسۇلتان ءابىش ۇلى نازاربايەۆتىڭ جارلىعىمەن جاريالانعان «ۇلتتىق دومبىرا» كۇنىن تۇركىستاندىقتار كەڭ كولەمدە اتاپ ءوتتى. ۇلتتىق ءداستۇر مەن ونەردى جاڭعىرتىپ، دارىپتەۋگە جول سالاتىن بۇل مەرەكە  قولونەر شەبەرلەرى مەن سۋرەتشىلەردىڭ كورمەسىمەن باستاۋ الدى. سونىمەن قاتار، ق.ا.ياساۋي كەسەنەسى الدىندا ش.قالداياقوۆ اتىنداعى وبلىستىق فيلارمونيانىڭ «سۇگىر» اتىنداعى ۇلت اسپاپتار وركەستىرىنىڭ كونسەرتىمەن جالعاسسا، مەرەكەلىك كۇن «كۇي قۇدىرەتى» كۇيشىلەردىڭ وبلىستىق بايقاۋىمەن قورىتىندىلاندى.

ۇلتتىق دومبىرا كۇنى مەرەكەسىنىڭ اشىلۋ سالتاناتىنا قاتىسقان تۇركىستان وبلىسى اكىمىنىڭ ورىنباسارى ۇلاسبەك سادىبەكوۆ بارشا تۇرعىنداردى وسىناۋ مەرەكەمەن قۇتتىقتادى.

«دومبىرا — قازاق حالقىنىڭ ەڭ كەڭ تاراعان ەكى ىشەكتى، كوپ پەرنەلى مۋزىكالىق اسپابى. ول – قازاقتار ومىرىندە ماڭىزدى ورىن الاتىن، وزىندىك مۋزىكالىق سيپاتى بار اسپاپ. العاش ەپيكالىق ءداستۇر شەڭبەرىندە جىر، تولعاۋ، تەرمەلەردى سۇيەمەلدەۋگە قولدانىلعان دومبىرا كەيىن اسپاپتىق شىعارما – كۇي جانرىنىڭ قالىپتاسۋىنا ىقپال ەتكەن. XIX عاسىردا قازاق حالقىنىڭ تۇرمىسىندا اناعۇرلىم كەڭ تاراعان مۋزىكالىق اسپاپ ەكى ىشەكتى دومبىرا بولاتىن. ءار ءتۇرلى ەسكەرتكىشتەرگە، سونداي-اق ەتنوگرافتاردىڭ جازىپ قالدىرعان ەڭبەكتەرىنە جۇگىنسەك، دومبىرا جانە وزگە حالىقتاردىڭ وسى تەكتەس اسپاپتارى ءتىپتى سوناۋ ورتا عاسىرلاردا بەلگىلى بولعان ەكەن. مىسالى، ءابۋ ناسىر ءال-فارابيدىڭ ەڭبەكتەرىنەن تامبۋر اسپابى جايىندا وقيمىز. قازاقتىڭ حالىق اسپابى دومبىرا XIV عاسىر جازبالارىندا كەزدەسەدى. ونىڭ باستاعى ءتۇرى مەن قۇرىلىسى قازاقتىڭ دومبىراسىنان اۋمايدى، وسىنداي اسپاپ اتتارىنىڭ ۇقساستىعى دا ولاردىڭ تۇپكى شىعۋ تەگى ءبىر ەكەكىن كورسەتسە كەرەك»،-دەدى ۇ.سادىبەك ۇلى.

«ۇلتتىق دومبىرا كۇنى» مەرەكەسى تۇركىستان وبلىسىنىڭ بارلىق اۋدان، قالالاردىڭ مادەنيەت جانە ونەر مەكەمەلەرىندە، ورتالىق ساياباقتاردا، ويىن-ساۋىق ورتالىقتارىندا، اشىق الاڭداردا ءتۇرلى مادەني ءىس-شارالار وتكىزىلۋدە.