مەملەكەت باسشىسى نۇرسۇلتان نازاربايەۆتىڭ باستاماسىمەن قازاقستاندىقتار بيىل تۇڭعىش رەت ۇلتتىق دومبىرا كۇنىن تويلاۋدا. اقتوبە وبلىسى مەرەكەنى ۇيىمداستىرۋعا ەرەكشە اتسالىستى. بارلىق ەلدى مەكەندەردە وتكەن 750 ءىس-شاراعا 270 مىڭ وبلىس تۇرعىنى قاتىستى.

ۇلتتىق دومبىرا كۇنىنە ارنالعان ۇلكەن مەرەكە 30 ماۋسىمدا باستالعان بولاتىن. اقتوبەدە ەكى جىل بۇرىن ورناتىلعان 6 مەترلىك دومبىرا جانىندا دومبىراشىلاردىڭ شەرۋى مەن بايقاۋى ءوتتى.

1 شىلدەدە وبلىس ورتالىعىنىڭ دا كوگىن ۇلى دالانىڭ اۋەندەرى كەرنەدى. جۇزدەگەن كاسىبي مۋزىكانتتار مەن اۋەسقوي دومبىراشىلار قازاق حالقىنىڭ كورنەكتى كومپوزيتورلارىنىڭ ولمەس تۋىندىلارىن قالانىڭ ءارتۇرلى جەرىندەگى 6 اشىق الاڭدا ءبىر مەزگىلدە ورىنداۋ ارقىلى ۇلتتىق مۋزىكالىق اسپاپقا دەگەن سۇيىسپەنشىلىكتەرىن ءبىلدىردى.

ەرتەمەن باستالعان مەرەكەلىك شارالار 12 ساعاتقا سوزىلدى. اقتوبە قالاسى مەن اۋدان ورتالىقتارىنىڭ بارلىق تۇرعىندارى مەن قوناقتارىنا دومبىراشىلار كونسەرتى، دومبىرادا ويناۋدى ۇيرەتۋ مەن اعاش قولونەرىنىڭ شەبەرلىك ساباقتارى، جاس كۇيشىلەر بايقاۋى، ەكسپوزيسيالىق جانە كىتاپ كورمەلەرى،  دومبىرا-پاتي، قولدانبالى ونەر بۇيىمدارىنىڭ جارمەڭكەسى مەن مۋزىكالىق ۆيكتورينالار ۇيىمداستىرىلدى.

مەرەكەنىڭ ەڭ جاس قوناقتارى ءۇشىن ارنايى ويىن-ساۋىق باعدارلاماسى دايىندالدى.

اقتوبەلىكتەر وڭىردە 1 شىلدە كۇنى  دۇنيەگە كەلگەن ءاربىر تۇڭعىش بالاعا دومبىرا تارتۋ ەتۋىمەن دە ەرەكشەلەندى.

نەگىزگى مەرەكە ورتالىق ستاديوندا ساعات 18:00-دە باستالدى. ونىڭ اقىرعى اككوردى 500 دومبىراشىنىڭ ستاديوندا «اءقتوبە» - «شاحتەر» فۋتبول ماچىنىڭ الدىندا «بالبىراۋىن» جانە قۇرمانعازىنىڭ «اداي» كۇيلەرىن، احمەت جۇبانوۆتىڭ «بي كۇيىن» ويناعان  فلەشموبى بولدى.

ايتا كەتەيىك، سول كۇنى ع.جۇبانوۆا اتىنداعى اقتوبە وبلىستىق فيلورمونياسىنىڭ ۇلتتىق اسپاپتار وركەسترى قازاق ۇلتتىق اسپاپتار مۇراجايىنىڭ اشىلۋىندا ەلوردا تۇرعىندارى مەن قوناقتارىن وزدەرىنىڭ شىعارمالارىمەن قۋانتتى.