ماقتاارال اۋدانىندا جاڭا وقۋ جىلىندا 8 ءبىلىم ۇياسى ەل يگىلىگىنە بەرىلەتىن بولادى.  بۇدان بولەك بيىل  8 مەكتەپتىڭ ىرگەتاسى قالانباق. سونداي-اق،  اۋداندا 5 ءمودۋلدى مەديسينالىق ترەكتىڭ قۇرىلىسى اياقتالۋعا جاقىن. بۇل تۋرالى اۋدان اكىمدىگىندە وتكەن جيىندا ءوڭىر باسشىسى جامانتاي بەيسەنبايەۆ ءمالىم ەتتى.

جيىن بارىسىندا اۋداندىق ساۋلەت، قالا قۇرىلىسى جانە قۇرىلىس ءبولىمىنىڭ باسشىسى سانسىزباي سەيدالييەۆ بايانداما جاسادى. ونىڭ ايتۋىنشا، 8 ءبىلىم وشاعىنداعى قۇرىلىس جۇمىستارى كەستەگە ساي جۇرگىزىلۋدە. بيىل جەتىساي قالاسىنداعى 80 گەكتار اۋماقتا 5 قاباتتى 60 پاتەرلى تۇرعىن ۇيلەردىڭ قۇرىلىسى باستاۋ الاتىن بولادى. بۇدان بولەك 4 قاباتتى 12 تۇرعىن ءۇيدىڭ بارلىق قۇجاتتارى وبلىستىق قۇرىلىس باسقارماسىنا وتكىزىلىپ قويعان.

اۋداننىڭ باس ارحيتەكتورى دوستىق جانە جامبىل اۋىلدىق وكرۋگى اكىمدىگىنىڭ جاڭا عيماراتتارى  مەن 5 ءمودۋلدى مەديسينالىق ترەكتەردىڭ دە قۇرىلىسى اياقتالعالى جاتقانىن حابارلادى.

اۋدان اكىمى جامانتاي بەيسەنبايەۆ جاڭادان سالىنىپ جاتقان مەكتەپتەردىڭ جىلۋ جۇيەسىن كومىردەن بولەك،  گازعا دا قوسا الاتىنداي ەتىپ جاساۋدى تاپسىردى.  ويتكەنى 2020 جىلعا دەيىن اۋدان ەلدى مەكەندەرى تولىقتاي گازبەن قامتىلاتىن بولادى. سونداي-اق، اۋدان باسشىسى كۇردەلى جانە ورتا جوندەۋدەن ءوتىپ جاتقان مەكتەپتەرگە باقىلاۋدى كۇشەيتۋدى تاپسىردى.

"بالالار - ءبىزدىڭ بولاشاعىمىز. ءبىز مەكتەپ سالۋدى توقتاتپاۋىمىز كەرەك. جاڭادان جوبالىق-سمەتالىق قۇجاتتاردى ازىرلەپ،  ەسكى مەكتەپتەردىڭ قاتارىن ازايتۋىمىز كەرەك"،  - دەدى جامانتاي قاناي ۇلى.

اۋداندا 8 اۋىلدىق وكرۋگتە مادەنيەت ۇيلەرى جوق ەكەنىن تىلگە تيەك ەتكەن ءوڭىر باسشىسى سوڭعى جىلدارى مادەنيەت سالاسىنا از كوڭىل ءبولىنىپ جاتقاندىعىن ايتتى. مادەنيەت ۇيلەرىن سالۋ ءۇشىن دە جوبالىق-سمەتالىق قۇجاتتار ازىرلەپ،  سالالىق باسقارماعا ۇسىنۋ كەرەكتىگىن ەسكەرتتى.