بقو-نىڭ  اقجايىق اۋدانىنا قاراستى شابدارجاپ مەكتەبىنىڭ  وقۋشىلارى جاڭا وقۋ جىلىندا Bilimbook كومپيۋتەر-ترانسفورمەرلەرىن پايدالاناتىن بولادى. شابدارجاپ اۋىلى – ورال قالاسىنان  300 شاقىرىم جەردە، اتىراۋ وبلىسىنىڭ شەكاراسىندا جاتقان شالعاي ەلدى مەكەن. مۇندا 198 ورىندىق مەكتەپ عيماراتىنىڭ قۇرىلىسى تولىق اياقتالىپ، جاڭا وقۋ جىلىنا شاكىرت قابىلداۋعا ساقاداي ساي.

- استانانىڭ تويى، ەلوردانىڭ 20 جىلدىعى – بۇكىل قازاقستاندىقتاردىڭ ورتاق قۋانىشى. ءدال وسى كۇنى ورال قالاسىنان شالعاي جاتقان شاعىن اۋىلدا وسىنداي زاماناۋي مەكتەپ عيماراتى پايدالانۋعا بەرىلۋى تەگىن ەمەس. ەلىمىزدەگى تىنىشتىقتىڭ، ەكونوميكالىق دامۋدىڭ، ەلباسى ساياساتىنىڭ ناقتى جەمىسىنىڭ ءبىر كورىنىسى – وسى، - دەدى وبلىس اكىمى التاي كولگىنوۆ تۇرعىندارمەن كەزدەسۋدە.

- سوڭعى جىلدارى مۇندا جىل سايىن 2-3 ءۇي جاڭادان سالىنادى ەكەن. بيىل اۋىل كاسىپكەرى تالعات مۇحامەدياروۆتىڭ باستاۋىمەن اۋىل ىشىندە جازعى تەحنيكالىق سۋ جۇيەسىن جۇرگىزدى. بۇل دەگەنىڭىز – ءار اۋلادا باۋ-باقشا وسىرۋگە كەرەمەت مۇمكىندىك. ءقازىر اۋىلدا 745 ادام تۇرادى. وتكەن وقۋ جىلىندا مەكتەپتە 154 وقۋشى بولعان ەدى. بيىل كۇزدە جاڭا مەكتەپكە 165 وقۋشى كەلگەلى وتىر، - دەدى تايپاق اۋىلىنىڭ اكىمى بولات بايعالي ۇلى.
سونىمەن قاتار، جۇمىس ساپارىمەن كەلگەن ءوڭىر باسشىسىنا اقجايىق اۋدانىندا مەملەكەتتىك باعدارلامالاردىڭ جۇزەگە اسىرىلۋى تۋرالى ەسەپ بەرىلدى. اۋدان اكىمى ءادىل جولامانوۆتىڭ ايتۋىنشا، شابدارجاپ جانە تومپاق اۋىلدارىنا اۋىز سۋ قۇبىرىن تارتۋ جۇمىستارى باستالدى، بۇل جوباعا 445،7 ملن.تەڭگە قاراستىرىلدى. ناتيجەسىندە ەكى اۋىلدىڭ 1000-نان استام تۇرعىنى تازا اۋىز سۋمەن قامتىلاتىن بولادى. سونداي-اق، اۋداننىڭ 14 ەلدى-مەكەنىندە اۋىز سۋمەن قامتۋ جۇمىستارى جۇرگىزىلۋدە. وعان قوسا، سولتۇستىك-باتىس ايماعىندا ەلەكت جەلىسىمەن جابدىقتاۋ جۇمىستارى جۇرگىزىلۋدە. اۋدان ورتالىعىندا 3 قاباتتى 24 پاتەرلىك تۇرعىن ءۇي قۇرىلىسى، اعىمداعى جىلى 4000 استام شارشى مەتر ءۇي سالۋ تۋرالى باياندالدى. 
ساپار سوڭىندا ءوڭىر باسشىسى اۋداننىڭ الەۋمەتتىك-ەكونوميكالىق دامۋ كورسەتكىشتەرىن جاقسارتۋ بويىنشا ءبىرقاتار تاپسىرمالار بەردى.