وتىرار اۋدانىندا تۇركىستان وبلىسىنىڭ اكىمى تۇيمەبايەۆ جانسەيىت قانسەيىت ۇلىنىڭ قاتىسۋىمەن زيالى قاۋىم وكىلدەرى، تاريحشى-ارحەولوگتار جانە ساۋلەت، قۇرىلىس سالاسى ماماندارىنىڭ كوشپەلى جيىنى ءوتتى.

ەڭ اۋەلى وتىرار اۋدانىنىڭ اكىمى ەرلان ايتاحانوۆ مارتەبەلى مەيماندارعا ارىستانباب كەسەنەسى مەن «وتىرارتوبە» تاريحي ورنى ماڭىنداعى اباتتاندىرۋ، كوگالداندىرۋ جۇمىستارىمەن تانىستىردى. 

«وتىرار – قازاق وركەنيەتىنىڭ التىن دىڭگەگى» دەپ  ەلباسى نۇرسۇلتان ءابىش ۇلى باعاسىن بەرگەن اۋداننىڭ قاتپار-قاتپار قويناۋىندا عاسىرلاردىڭ بۇككەن سىرلارى مەن تاريحى ۇرپاققا كوزدىڭ قاراشىعىنداي ساقتاپ، تەرەڭ ۇعىنۋى ءتيىس  امانات ەكەندىگى انىق.

وسى ورايدا وتكەنى كونەدەن تامىر تارتقان وتىراردىڭ كۇللى مۇسىلمانعا ورتاق وتىز مىڭنان اسا تاريحي مۇراسى جيناقتالعان  «وتىرار مەملەكەتتىك ارحەولوگيالىق قورىق-مۋزەيى» كۇردەلى جوندەۋدەن ءوتىپ، تۋريستەرگە قالتقىسىز ەڭبەك ەتۋدە. اتالعان نىساندى ارالاپ كورگەن ايماق باسشىسى تۋريزم سالاسىنا جان ءبىتىرۋدى ءارى قاراي دا جالعاستىرۋ كۇننىڭ باستى مىندەتى ەكەندىگىن جەتكىزدى.

جيىنعا قاتىسۋشىلار وبلىس اكىمىنىڭ باستاماسىمەن قولعا الىنعان «تۋعان جەردى تۇلەتۋ پەرزەنتتىك پارىز» اكسياسى اياسىندا «ءبىلال اتا» بالاباقشاسىنىڭ سالتاناتتى اشىلۋىنا قاتىستى. وتىرار اۋدانىنىڭ اكىمى ە.ايتاحانوۆتىڭ ۇيىمداستىرۋىمەن اكسياعا بەلسەنە ازاماتتىق قولداۋ كورسەتكەن وتىرارلىق كاسىپكەر - سەرىك نامايەۆ. مەملەكەتتىك-جەكەمەنشىك ارىپتەستىك اياسىندا 100 ملن. تەڭگەگە 100 ورىندىق بالاباقشا سالىپ، ەل يگىلىگىنە بەردى. بالعىن بالالاردى زور قۋانىشقا كەنەلتكەن مەكتەپكە دەيىنگى مەكەمەنىڭ لەنتاسىن سالتاناتتى تۇردە وبلىس اكىمى جانسەيىت قانسەيىت ۇلى قيىپ، وتىرار حالقىنىڭ ۇيىمشىلدىعى مەن اتقارعان ىستەرىنە العىسىن ءبىلدىردى.

ساپار بارىسىندا وبلىس اكىمى ءشاۋىلدىر اۋىلىنداعى گاز تارتۋ جۇيەلەرىنىڭ قۇرىلىس جۇمىستارىمەن تانىستى.  وتىرار اۋدانىندا اعىمداعى جىل - كوگىلدىر وتىنمەن قامتاماسىز ەتۋ جىلى دەپ اتالعان. وسى ماقساتتا وتىرار اۋدانىنىڭ 34 ەلدى مەكەنىن گازداندىرۋ ءىسى  جوسپارلانسا، بيىل ءشاۋىلدىر جانە تەمىر اۋىلدارىندا قۇرىلىس جۇمىستارى كەستەگە سايكەس قارقىندى جۇرۋدە. سونىمەن قاتار ش.قالداياقوۆ، ەسكى شىلىك، جاڭا شىلىك جانە اقتوبە ەلدى مەكەندەرىن  گازداندىرۋ جۇمىستارىنا قارجى قارالىپ، قۇرىلىس جۇمىستارى تاياۋدا قارقىن الماق. ال، سىرداريانىڭ سول جاعالاۋىنداعى 12 ەلدى مەكەندى گازداندىرۋعا جوبالىق سمەتالىق قۇجاتىن دايىنداۋ ءۇشىن ساۋلەت-جوسپارلاۋ جۇمىسى دايىندالىپ، وبلىستىق بيۋدجەتكە ۇسىنىلدى. 

سونىمەن قاتار وبلىس باسشىسى ەلوردامىز استانا قالاسىنىڭ 20 جىلدىعى مەرەيلى مەرەكەسىنە تارتۋ رەتىندە  تەمىر اۋىل وكرۋگىندە 1 بالاباقشا مەن 1 مادەنيەت ءۇيىنىڭ پايدالانۋعا بەرىلگەن ءىس-شارالارىنا قاتىستى.  

ءوڭىر باسشىسى شىلىك اۋىلىنداعى «نۇر شىلىك» اۋىل شارۋاشىلىق كووپەراتيۆىنىڭ دە تىنىس-تىرشىلىگىمەن تانىستى. اتالمىش كووپەراتيۆ ءسۇت وڭدەۋ ءىسىن جولعا قويىپ، كاسىبىن دامىتۋ ءۇشىن «ىرىس» ميكرو قارجى ۇيىمىنان 16،0 ملن تەڭگە العان. كۇنىنە 500 ليتر ءسۇت ونىمدەرىن دايىندايتىن كاسىپكەرلىك نىساندا 300 باس سيىر، 2256 باس ۋاق مال، 217 باس تۇيە بار.

وبلىس اكىمى وتىرار اۋدانىنا جاساعان ءىسساپارىندا اتقارىلعان شارۋالارعا وڭ باعاسىن بەردى.