باتىس قازاقستان وبلىسى اكىمى التاي كولگىنوۆ داريان جانە شابدارجاپ اۋىلىندا سالىنعان سۋ جاڭا مەكتەپ عيماراتىمەن تانىستى، دەپ جازادى Qamshy.kz.

جاڭا قۇرىلىس نىساندارىنىڭ ساپاسىن تەكسەرە كەلگەن ءوڭىر باسشىسى التاي كولگىنوۆ جۇرتشىلىقپەن جۇزدەسىپ، اۋىل حالقىن ەلدە جانە وبلىس اۋماعىندا اتقارىلىپ جاتقان جۇمىستار جونىندە حاباردار ەتتى. اۋدانداردا «سيفرلىق قازاقستان» باعدارلاماسى اياسىندا «نۇر وتان» پارتياسىنىڭ قولداۋىمەن ءىت سىنىپ اشىلادى. سونداي-اق 300 ورىندىق مەكتەپ-گيمنازيا عيماراتى مەن 100 ورىندىق ينتەرنات سالۋدىڭ قۇجاتتاماسى ءازىر.

زەلەنوۆ اۋدانىنا قاراستى داريان اۋىلى بۇرىن اۋدان ورتالىعى بولعان ءىرى ەلدى مەكەن. مۇندا بىلتىردان بەرى 300 وقۋشىعا ارنالعان جاڭا مەكتەپتىڭ عي­ماراتى جانە مەكتەپ جانىنان 100 بالاعا لايىقتالعان ينتەرنات ءۇيى قۇرىلىسى ءجۇرىپ جاتىر. سوڭعى ۇلگى­دەگى بارلىق وقۋ قۇرالدارىمەن قام­تىلعان مەكتەپتىڭ ەڭ باستى ەرەكشەلىگى، مۇندا وبلىستا العاشقى بولىپ ءىت- سىنىپ اشىلادى. ال اقجايىق اۋدا­نىن­داعى شابدارجاپ اۋىلى ورالدان 300 شاقىرىم جەردە جاتقان شالعاي ەلدى مەكەن. بىلتىر تامىز ايىندا باستالعان 198 ورىندىق مەكتەپ عيماراتىنىڭ قۇرىلىسى تولىق اياق­تالىپ، جاڭا وقۋ جىلىنا شاكىرت قابىل­داۋعا دايىن تۇر.

بارلىق وقۋ كابينەتتەرى قاجەتتى قۇرالدارمەن جابدىقتالعان. سوڭعى ۇلگىدەگى روبوت-تەحنيكا كابينەتى، تەحنولوگيا پانىنە قولدانىلاتىن ءتۇرلى قۇرىلعىلار مەن تىگىن ماشينالارى تۇر. وڭىردەگى وزگە مەكتەپتەر سياقتى شابدارجاپ مەكتەبىندە دە جاڭا وقۋ جىلىندا وقۋشىلار Bilimbook كومپيۋتەر-ترانسفورمەرلەرىن پايدالاناتىن بولادى. Bilimbook – نازاربايەۆ زياتكەرلىك مەكتەپتەرى جۇيەسىندە سىناقتان وتكەن وزىق ۇلگىلى، جاڭا ادىستەمەلى ساباقتار جۇك­تەلگەن كومپيۋتەر-ترانسفورمەر. ول ينتەرنەتكە قوسىلماي-اق پايدالانۋعا جارامدى. قازاق، ورىس، اعىلشىن تىلىندە باعدارلامالار جۇكتەلگەن Bilimbook جادى 2-3 اي سايىن جاڭارتىلىپ تۇرادى.

– ەلباسى جاقىندا ورال قالاسىنا كەلگەن ساپارىندا وڭىردەگى شاعىن جيناقتى مەكتەپتەر جونىندە ارنايى سۇرادى. ويتكەنى وبلىستاعى مەكتەپتىڭ 60 پايىزى شاعىن جيناقتى مەكتەپكە جاتادى. ءبىز وسىنداي 223 مەكتەپتى Bilimbook كومپيۋتەر-ترانسفورمەرىمەن قامتاماسىز ەتە­ءمىز. كەرەك جەرىندە ينتەرنات سالىپ­ جاتىرمىز. الداعى 2-3 جىلدا ءوڭىر­دە ستۋدەنتتەرگە ارنالعان 7 جاتاق­حانا بوي كوتەرەدى. وڭىرگە قاجەتتى ماماندىقتارعا گرانتتار بولەمىز. ءبىلىم ماسەلەسى ءبىزدىڭ ەرەكشە نازارىمىزدا، – دەدى تۇرعىندار الدىندا اعىنان جارىلعان ا. كولگىنوۆ.