جاقىندا رەسپۋبليكالىق ماڭىزى بار قالالاردىڭ ءبىرى شىمكەنتتە ميگراسيالىق حقو اشىلىپ، ول ەڭبەك ميگرانتتارىنا مەملەكەتتىك قىزمەتتەر كورسەتۋدە. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسپا ءسوز قىزمەتى جازدى، دەپ حابارلايدى Qamshy.kz اقپارات اگەنتتىگى digitalkz.kz سايتىنا سىلتەمە جاساپ.

 22ء-شى ماۋسىمدا شىمكەنت قالاسىندا ميگراسيالىق حالىققا قىزمەت كورسەتۋ ورتالىعى ءوز جۇمىسىنا كىرىسكەن بولاتىن. ونى «ازاماتتارعا ارنالعان ۇكىمەت» مەملەكەتتىك كورپوراسياسى ق ر ىىم-مەن بىرلەسىپ اشقان ەدى.

محقو-دا شەتەلدىك ازاماتتار مەملەكەتتىك قىزمەتتەردى «ءبىر تەرەزە» قاعيداتى بويىنشا بەكىتىلگەن ستاندارتقا ساي الا الادى. ولار: ەلەكتروندىق كەزەك، ارنايى جابدىقتالعان جۇمىس ورىندارى، ءپروفيلدى ماماندار جانە ىڭعايلى جۇمىس كەستەسى. قىزمەت الۋشىلار 1-2 ساعاتتىڭ ىشىندە مەديسينالىق تەكسەرىستەن، داكتيلوسكوپيادان وتە الادى. سونداي-اق ساقتاندىرۋ ءپوليسىن راسىمدەپ، جەكە سايكەستەندىرۋ ءنومىرىن (جسن) الا الادى.

جاڭا محقو جۇمىس بارىسىن جەڭىلدەتىپ قانا قويماي، سىبايلاس جەمقورلىق ارەكەتتەرىنىڭ الدىن-الۋعا جول اشادى. جىل باسىنان بەرى كوشى-قون باعىتى بويىنشا 267 287 مەملەكەتتىك قىزمەت كورسەتىلگەن.

«ازاماتتارعا ارنالعان ۇكىمەت» مەملەكەتتىك كورپوراسياسىنىڭ تۇركىستان وبلىسى بويىنشا فيليالىنىڭ ديرەكتورى ەرجان جەڭىسبەكوۆتىڭ ايتۋىنشا، ەلىمىزگە كەلگەن شەتەلدىك ازاماتتار قۇجاتتارىن 1 كۇننىڭ ىشىندە الۋ مۇمكىندىگىنە يە بولدى. ال، بۇرىن بىرنەشە كۇن كەتەتىن.

«بۇرىن شەتەلدىكتەر جۇمىس ىستەۋگە رۇقسات الۋ ءۇشىن قاجەتتى قۇجاتتارىن راسىمدەپ، بىرنەشە كۇن جۇرەتىن. جسن الىپ، سالىق ماسەلەسىن شەشىپ، ساقتاندىرۋ انىقتاماسىنا قول جەتكىزۋ ءۇشىن بىرنەشە مەكەمەنى ارالاۋشى ەدى. ەندى شەتەلدىكتەر قۇجاتتاردى بەس كۇن بويى ەمەس، ءبىر كۇننىڭ ىشىندە راسىمدەۋ مۇمكىندىگىنە يە بولدى.  بۇل ميگرانتتار ءۇشىن عانا ەمەس، جۇمىس بەرۋشى ءۇشىن دە وتە قولايلى»، - دەيدى ول.  

وڭىردەگى جاڭا ورتالىق نۇرسات ىقشاماۋدانى، بايتەرەكوۆ كوشەسى، 89 ءۇي مەكەنجايىندا ورنالاسقان.  اتالعان مەكەمە تاڭعى ساعات 09-دان كەشكى ساعات 18.30- دەيىن، تۇسكى ءۇزىلىسسىز قىزمەت كورسەتەدى.

ايتا كەتەيىك، ەلىمىزدەگى ەڭ العاشقى ميگراسيالىق حقو 2018 جىلدىڭ قاڭتارىندا استانادا اشىلعان بولاتىن. ونىڭ نەگىزگى ماقساتى - كوشى-قون قىزمەتىن وڭتايلاندىرۋ. جالپى ميگراسيالىق حقو ءوز كەزەگىندە كوشى-قون سالاسىنداعى كەدەرگىلەردى جويۋعا باعىتتالىپ، شەتەلدىك ازاماتتارعا مەملەكەتتىك قىزمەت تۇرلەرىن كورسەتۋدە. جاقىندا وسىنداي ورتالىق استانا قالاسىنىڭ ەسىل جانە سارىارقا اۋداندارىندا اشىلماق. بۇعان قوسا، الماتى جانە اقتوبە قالالارىندا ميگراسيالىق حقكو اشىلادى دەپ جوسپارلانىپ وتىر.