اعىمداعى جىلى حالىققا كورسەتىلەتىن ەلەكتروندىق قىزمەتتىڭ سانى 19-دى قۇرايتىن بولادى. بۇل جايىندا «ازاماتتارعا ارنالعان ۇكىمەت» مەملەكەتتىك كورپوراسيانىڭ باسپا ءسوز قىزمەتى مالىمدەدى، دەپ حابارلايدى Qamshy.kz اقپارات اگەنتتىگى digitalkz.kz سايتىنا سىلتەمە جاساپ.

2018 جىلدىڭ سوڭىنا دەيىن 19 مەملەكەتتىك قىزمەت SMS ارقىلى ۇسىنىلىپ، پرواكتيۆتى قىزمەتتەر سانى ارتا تۇسەدى ەكەن.

 «تمد ەلدەرى بويىنشا قازاقستان پرواكتيۆتى قىزمەتتەردى العاشقى بولىپ ەنگىزدى. بىلتىر ءبىز بالا تۋۋ بويىنشا مەملەكەتتىك قىزمەتتەر كەشەنىن پرواكتيۆتى تاسىلمەن ۇسىنا باستادىق. ازاماتتاردىڭ قاجەتتىلىگىن الدىن الا بولجاپ، ۋاقىتتارىن ۇنەمدەيتىن اسا قولايلى قىزمەتكە دەگەن قىزىعۋشىلىق كۇن سايىن ارتىپ كەلەدى. بۇگىنگى تاڭدا جاڭا بوسانعان 157 مىڭعا جۋىق ايەلگە SMS-ۇسىنىس جىبەرىلدى. جۋىردا الەۋمەتتىك ماسەلەلەر بويىنشا تاعى دا ءبىرقاتار قىزمەتتەردى پرواكتيۆتى نۇسقادا، ياعني SMS-حابارلاما ارقىلى كورسەتەتىن بولامىز»، - دەدى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتوراعاسى ابىلايحان وسپانوۆ.  

سونداي-اق، ول سيفرلاندىرۋ پروسەسى ءجۇرىپ جاتسا دا، ءالى قاعازباستىلىقتىڭ بار ەكەندىگىن ايتىپ، ءبىرقاتار قيىندىقتارعا توقتالدى.

«ەلىمىزدە جاپپاي سيفرلاندىرۋ ءۇردىسى ءجۇرىپ جاتقانىنا قاراماستان، مەمقىزمەتتەردىڭ 51 پايىزى ءالى كۇنگە دەيىن قاعاز جۇزىندە ۇسىنىلادى، ونىڭ ۇستىنە قازاقستاندىقتار قىزمەتتەردى ەلەكتروندىق نۇسقادا الۋعا ايتارلىقتاي تىلەك تانىتپاي وتىر. سونداي-اق ءبىر قىزمەتتى الۋ ءۇشىن باسقا ءبىر قىزمەتكە جۇگىنۋ قاجەت جانە ازاماتتار 311 قىزمەت بويىنشا ءبىزدىڭ فرونت-وفيستەرگە بىرنەشە رەت كەلۋگە ءماجبۇر. بۇل ورايدا قاشىقتان قىزمەت كورسەتۋ پروسەسى بويىنشا ءالى دە قاراپايىم جانە ءقاۋىپسىز مەحانيزمنىڭ جوق ەكەندىگىن ايتۋ كەرەك»، - دەدى ا. وسپانوۆ.

ال، 19 پرواكتيۆتى قىزمەتتەر قانداي دەگەن سۇراققا كەلەر بولساق، جۇكتىلىككە، بالا اسىراپ الۋعا، مۇگەدەكتىكتى بەلگىلەۋگە، كوپبالالى انالارعا جاردەماقى تاعايىنداۋعا، قايتىس بولۋدى تىركەۋگە بايلانىستى مەملەكەتتىك قىزمەتتەر تەلەفوننىڭ SMS-حابارلاماسى ارقىلى راسىمدەلەتىن بولادى. سونداي-اق،  مەملەكەتتىك كەپىلدىكتەردى تولەۋ، جىلجىمايتىن مۇلىكتىڭ سيپاتتاماسىن وزگەرتۋ، اتقارۋشىلىق ءىس جۇرگىزۋدى قوزعاۋ جۇمىستارى جانە ءبىلىم بەرۋ سالاسىنداعى قىزمەتتەر كەشەنى دە ەلەكتروندى نۇسقادا ۇسىنىلادى.

ايتا كەتەيىك، 10-شى شىلدە كۇنى حالىقارالىق ساراپشىلاردىڭ قاتىسۋىمەن «قازاقستاندا «ەلەكتروندىق ۇكىمەت» پەن مەملەكەتتىك قىزمەتتەردىڭ دامۋى» اتتى دوڭگەلەك ۇستەل وتكەن بولاتىن. كەڭەس بارىسىندا ا. وسپانوۆ سيفرلاندىرۋ اياسىندا جۇزەگە اسىپ جاتقان پرواكتيۆتى قىزمەت كورسەتۋدىڭ ماڭىزدىلىعىن اتاپ ءوتىپ، جوعارىداعى جاعدايلاردى ايتقان بولاتىن.