الماتىداعى بالۋان شولاق اتىنداعى سپورت سارايىندا ەكى ۇرىنىڭ قولىنان قازا تاپقان مانەرلەپ سىرعاناۋ شەبەرى دەنيس تەنمەن قوشتاسۋ ءراسىمى وتۋدە، دەپ حابارلايدى Qamshy.kz اقپارات اگەنتتىگى.
قىسقا عانا عۇمىرىندا ەلىنىڭ سۇيىكتى ۇلىنا اينالا بىلگەن سپورتشىمەن قوشتاسۋعا كەلگەن حالىقتىڭ قاراسى وتە كوپ.
سپورت سارايىنا ادامدار كىرىپ ۇلگەرە الماي جاتىر. ەلىمىزگە بەلگىلى مانەرلەپ سىرعاناۋ شەبەرىمەن قوشتاسۋعا كەلگەن قالا تۇرعىندارىنىڭ ءبىرى: «بۇگىن دەنيس تەنمەن قوشتاسۋ شاراسى بولىپ جاتىر. ءبىراق سپورت سارايىنىڭ ىشىنە كىرە الماي جاتىرمىز. بالۋان شولاق سپورت سارايىنىڭ الدىندا حالىق وتە كوپ، ەسىككە سىيماي جاتقان سەكىلدى»، - دەيدى.
سپورتشىنى اقتىق ساپارعا شىعارىپ سالۋعا الماتى قالاسى اكىمدىگى، ەلىمىزگە بەلگىلى بوكسشى گەنناديي گولوۆكين، ساياساتتانۋشى ايدوس سارىم جانە وزگە دە قوعام قايراتكەرلەرى مەن بەدەلدى تۇلعالار كەلگەن.
