كەشە كەشكىسىن استانادا بەيبىتشىلىك پەن مولداعۇلوۆا كوشەلەرىنىڭ قيىلىسىندا ۇلتتىق ۇلان اسكەريلەرى سەرجانت ايزات دۇيسەكەيەۆ پەن قاتارداعى الەكساندر سۋششيككە ءبىر ايەل ادام كەلىپ، تۇتىندەپ جاتقان ۇيدەن ەر ازاماتتى قۇتقارۋعا جاردەم جاساۋىن سۇرايدى.
ونىڭ ايتۋىنشا پاتەردە ەگدە تارتقان ەر ازامات قالىپ، ءوز ەركىمەن باساپانادان شىعا الماي جاتىر ەكەن. بەيبىت تۇرعىندارعا كومەككە كەلۋدى پارىزى سانايتىن جاۋىنگەرلەر بىردەن تۇتىندەپ جاتقان پاتەر جاققا قاراي جۇگىرەدى.
سويتسە، ءتۇتىن كۇللى پودەزدگە تاراپ، ادام ومىرىنە ءقاۋىپ توندىرە باستاعان ەكەن. بۇعان سەسكەنبەگەن ۇلاندىق اسكەريلەر ءتۇتىن اراسىنان پاتەرگە كىرىپ، بولمە ەدەنىندە ەسىنەن تانايىن دەپ جاتقان ەر ادامدى بايقايدى. جەدەل قيمىلداعان اسكەريلەر ونى ءقاۋىپسىز جەرگە شىعارىپ، باسقا تۇرعىنداردىڭ دا شىعۋىنا جاردەم جاسايدى.
ورتتەن قۇتقارۋ قىزمەتى مەن جەدەل مەديسينالىق جاردەم كەلگەنشە ۇلاندىقتار تۇرعىنداردىڭ قاۋىپسىزدىگى ءۇشىن قولدان كەلگەنىن جاساعان.
